రైతులు ఆరుతడి పంటలు సాగు చేయాలి : మంత్రి ఉత్తమ్‌కుమార్‌ రెడ్డి

ఎల్‌నినో ప‌రిస్థితుల దృష్ట్యా రైతాంగం యాసంగిలో ఆరుత‌డి పంట‌ల‌ను సాగు చేయాల‌ని రాష్ట్ర భారీ నీటిపారుద‌ల శాఖ మంత్రి ఎన్‌.ఉత్త‌మ్‌కుమార్‌రెడ్డి అన్నారు. బుధవారం కోదాడ నియోజకవర్గ పరిధిలోని రెడ్లకుంట ఎత్తిపోతల పథకం పనులను పరిశీలించిన అనంతరం నిర్వహించిన సమావేశంలో...

కోదాడ‌, న‌వంబ‌ర్ 11 : ఎల్‌నినో ప‌రిస్థితుల దృష్ట్యా రైతాంగం యాసంగిలో ఆరుత‌డి పంట‌ల‌ను సాగు చేయాల‌ని రాష్ట్ర భారీ నీటిపారుద‌ల శాఖ మంత్రి ఎన్‌.ఉత్త‌మ్‌కుమార్‌రెడ్డి అన్నారు. బుధవారం కోదాడ నియోజకవర్గ పరిధిలోని రెడ్లకుంట ఎత్తిపోతల పథకం పనులను పరిశీలించిన అనంతరం నిర్వహించిన సమావేశంలో ఆయ‌న‌ మాట్లాడారు. ఎల్‌నినో ప్రభావాన్ని ఎదుర్కొనేందుకు అలాగే రైతులు, ప్రజల కోసం అవసరమైన చర్యలన్నీ తీసుకుంటామన్నారు. కృష్ణా, గోదావరి జలాల పరిరక్షణకు ప్రభుత్వం ప్రాధాన్యం ఇస్తుందన్నారు. తెలంగాణలో సాగు విస్తీర్ణం, వరి ఉత్పత్తి, ధాన్యం కొనుగోళ్లు పెరిగిన‌ట్లు తెలిపారు. ఈ ఖరీఫ్‌లో చాలా వరకు పంటలను కాపాడగ‌లిగామ‌న్నారు. కోతలు సాగుతున్న ఈ ఖరీఫ్‌లో తెలంగాణలో రికార్డు స్థాయిలో పంటలు పండిన‌ట్లు తెలిపారు. రైతు భరోసా, బీమా సహా అన్ని అంశాల్లో రైతుల మేలుకే ప్రాధాన్యం ఇచ్చిన‌ట్లు పేర్కొన్నారు. ఈ కార్య‌క్ర‌మంలో ఎంపీ రఘువీర్ రెడ్డి, ఎమ్మెల్యే పద్మావతి, కలెక్టర్ తేజస్ నంద్‌లాల్ ప‌వార్ పాల్గొన్నారు.