Mission Bhagiratha | మిషన్ భగీరథ పైపు పగిలి వృథా నీళ్లు.. పట్టించుకోని అధికారులు

వెంకట్రావుపేట నుండి చందాపూర్ రాంపూర్ వెళ్లే మార్గంలో మిషన్ భగీరథ పైపులైన్ పదేపదే పగులుతుండటంతో వేల లీటర్ల తాగునీరు వృథాగా పోతోంది.

తొగుట: సిద్దిపేట జిల్లా తొగుట మండలంలో వెంకట్రావుపేట నుండి చందాపూర్ రాంపూర్ వెళ్లే మార్గంలో మిషన్ భగీరథ పైపులైన్ పదేపదే పగులుతుండటంతో వేల లీటర్ల తాగునీరు వృథాగా పోతోంది.
15 రోజుల్లోనే మూడు నాలుగు సార్లు పైపు పగిలిందని, పొలాల్లోకి నీరు ఉధృతంగా వస్తూ వరి పంటలోకి చేరుతోందని రైతులు ఆవేదన వ్యక్తం చేస్తున్నారు. పగిలిన చోట నుంచి ఫౌంటెన్ లా నీరు ఎగజిమ్ముతూ కాలువల్లోకి ప్రవహిస్తోంది.

ఎంత చెప్పినా మిషన్ భగీరథ అధికారులు తాత్కాలిక మరమ్మతులు చేసి వెళ్తున్నారని, శాశ్వత పరిష్కారం చూపడం లేదని గ్రామస్తులు ఆరోపిస్తున్నారు. ఒక పక్క తాగునీటికి ఇబ్బందులు ఉంటే, మరో పక్క ఇలా నీరు వృధా అవ్వడం బాధాకరమన్నారు. దీనివల్ల పంట పొలాలు దెబ్బతినడంతో పాటు, ప్రభుత్వ ఖజానాకు నష్టం వాటిల్లుతోంది. కాబట్టి అధికారులు ప్రత్యేక దృష్టి సారించి, నాణ్యమైన పైపులతో శాశ్వత మరమ్మతులు చేపట్టాలని రైతులు, ప్రజలు కోరుతున్నారు.