తళతళ

అతను వినువీధిలో తారకలను పొదిగి అంబరంపై మెరుపుల నేత నేసి పచ్చని సింగారాలద్దిన మట్టిబంతిని సంద్రాలలో చుట్టి కిందికి దింపాడు తన ఆటవిడుపు కోసం

అతను వినువీధిలో తారకలను పొదిగి
అంబరంపై మెరుపుల నేత నేసి
పచ్చని సింగారాలద్దిన మట్టిబంతిని
సంద్రాలలో చుట్టి కిందికి దింపాడు
తన ఆటవిడుపు కోసం

నరుడు నరేతరాల కల్పనతో
సవ్వడి తరంగాలను,
కాంతిరేఖలను గుమ్మరించాడు
ఏ ఏమరుపాటునున్నాడో
తనకు పోటీదారులను
కొందరిని జారవిడిచాడు

గోడలపై తెల్లని కాగితాలపై
చేస్తున్న ప్రతి సృష్టికి నిశ్చేష్ఠుడై
తోలుముక్కల లోంచి
చెక్కపెట్టెల లోంచి
లోహ వస్తువుల లోంచి

అవతరిస్తున్న నాదాలకు, రవళులకు
సమ్మోహితుడవుతున్నాడు
అలంకారాలు నిండిన పొగడ్తలకు,
వర్ణనలకు ఉబ్బితబ్బిబ్బై
తొలుస్తున్నా చెక్కుతున్నా ఓర్చుకొని
మౌనంగా ఒదిగి మలిచినట్టుగా
రూపుదిద్దుకుంటున్నాడు

ఒక్క కనుదోయిలో నిప్పురవ్వలు.
మోహానురాగాలు
భయవిభ్రాంతులు క్షణాల్లో మారే
దృశ్యానికి విస్మయుడవుతున్నాడు

ఆనందోబ్రహ్మ!
కళ దైవదత్తం కాదీ వేళ
అది దైవసమానం
ఇపుడు అతడు గర్వి
వీరి సృజనకే తన భుజమెత్తుకొని.

-డా.కాచాపురం దుర్గాదేవి
7893093495