మట్టంటకుండా

మనం గుమ్మం బయట విడిచేస్తాం మనల్నెప్పుడూ గుండెల్లోనే పెట్టుకుంటాయి

మనం గుమ్మం బయట విడిచేస్తాం
మనల్నెప్పుడూ గుండెల్లోనే పెట్టుకుంటాయి
గుడి బయట విడిచినా గుమ్మం బయట విడిచినా
ఏమీ నొచ్చుకోక కాళ్లు ముందుకు జరపగానే
జోడెడ్లు కాడి మీదేసుకున్నట్టు
పాదాల్ని మీదేసుకుని
బాధ్యతగా బయలుదేరుతాయి

ఎన్నిసార్లు తెగినా గుప్పెడు కుట్లేసుకుని
తెగని బంధంలా కాళ్లను చుట్టేసుకుని మురిసిపోతాయి

కొత్తవి కొనలేని పేదరికానికి
అరిగీ కరిగీ ఒళ్లంతా తూట్లు పడినా
చివరి రక్తపు బొట్టును కూడా
మన క్షేమానికే ధారపోసినట్టు
మళ్లీ మళ్లీ ప్రాణం పోసుకుని
పంటి బిగువున పల్లకీలా మోస్తాయి

చేరదీసిన కాళ్లను గుండెల్లో పెట్టుకుని
క్షేమంగా ఊరేగించటమే
వాటికి తెలిసిన ప్రేమ విద్య

అప్పుడప్పుడూ
మన కోపానికి ఆయుధాలు గానూ
నిండు సభలో అవినీతి రాజకీయ నాయకులకు
నిరసనతో చెప్పుదెబ్బలు గానూ మారుతాయి

మనుషుల్లా నమ్మించి గొంతుకోయవవి
ముళ్లు గుచ్చుకున్న సంగతి కూడా
మూడో కంటికి తెలియకుండా
మనల్ని నిత్యం కాపాడుతాయి

ముళ్లు చేసిన గాయాలెన్నిటినో
తమలోనే గుట్టుగా దాచుకుని
పాదాలను పసిపిల్లల్లా కాపాడుతూ
మనుషుల్ని మట్టంటకుండా గమ్యాన్ని చేరుస్తాయి!

చిత్తలూరి
91338 32246