ఈ నల్లని రాలలో
ఏ కన్నులు దాగెనో
ఈ బండల మాటున
ఏ గుండెలు మ్రోగెనో ॥ఈ॥
పాపాలకు తాపాలకు
బహుదూరములో నున్నవి
మునులవోలె కారడవుల
మూలలందు పడియున్నవి ॥ఈ॥
కదలలేవు మెదలలేవు
పెదవి విప్పి పలుక లేవు
ఉలి యలికిడి విన్నంతనె
గలగలమని పొంగిపొరలు ॥ఈ॥
పైన కఠినమనిపించును
లోన వెన్న కనిపించును
జీవమున్న మనిషికన్న
శిలలే నయమనిపించును ॥ఈ॥
1964 నాటి ‘అమరశిల్పి జక్కన’ సినిమాలోని ఈ ప్రఖ్యాత గీతం వాస్తవానికి ‘రామప్ప’ అనే సంగీత రూపకంలోనిది. 1959లో సినారె రచించిన ఈ సంగీత రూపకం తెలుగులోనేగాక, దేశంలోని మరో 13 భాషల్లోకి అనువాదమై ఆకాశవాణి కేంద్రాల నుంచి ప్రసారమైంది. రామప్ప శిల్పసంపదను చూసి న తన్మయత్వంలో సినారె సంగీతరూపకాన్ని రచించారు.