సజీవ చిత్రం

చిగురించిన మామిడిచెట్టులా విరగబూసిన వేపపూతలా తెలంగాణ యాస ఎదలో సప్పుడై ఇనవడుతది...

చిగురించిన మామిడిచెట్టులా
విరగబూసిన వేపపూతలా
తెలంగాణ యాస
ఎదలో సప్పుడై ఇనవడుతది…

జానెడు బట్టల అందాలు లేవు
తీన్మార్‌ స్టెప్పులు లేవు
తీరొక్క పల్లె జీవనం ఉట్టిపడుతుంది…

కట్టుబాట్లు
తెగ ఉద్వేగంతో దర్శనమిస్తాయి..

తీరొక్క చెట్లకు గాసిన
కూరగాయలన్నీ కలగూరలో
కలిసి మెలసినట్టూ..

మెత్కులుగా ఉడికించిన
ఐకమత్యమే మహాబలం అన్నట్టుగా
పిడికిలిలో ఒకటైన
బువ్వముద్దల సంస్కృతి
పచ్చటి ఇస్తరాకుపై
పరుచుకున్నా
పల్లెజీవనం కనవడుతుంది..

చియ్యకూరల రుచి
మూలుగు బొక్కలపై ఉన్న అభిరుచి
చింతచెట్టు నీడలో
కాలం ఎల్లపోసిన దినాలు…
ఎట్ల మరుతుము

గొర్రె కోయలు
పడమటికి వాలంగానే
దుడుక్కుమని లేసి
దిగమింగిన సుద్దులన్నీ….
యాది మర్వలేము

కానుగ చెట్టు
ఎండాకాలంలో చిగురించినట్టు
ఎదనిండుగా నీడను
పల్లె ఎరుక జేస్తది..
సంబురం అనగానే
దండలోని దారాన్ని
హత్తుకున్న మల్లెలా
ఊరు జనమంతా రచ్చకట్ట కాడికి చేరి
చెప్పుకున్న సుద్దులను ఎరుకజేస్తది….

మీసాలు మెలేసిన తాతయ్య
మాసం బంగారం పెట్టి
మెట్టినింటికి సాగనంపిన తీరు..
పల్లెను కన్నీరు వెట్టిస్తది

ఆవులమంద నుంచి విడదీయబడిన
పెయ్యదూడ బాధను గుర్తుచేస్తది…

అన్నదమ్ముల అనుబంధాన్ని
అన్నాచెల్లెళ్ల అనురాగాన్ని
బావా బామ్మర్ధుల బంధాన్ని
బావ మరదండ్ల మూగ భాషని
అన్నిటిని కలగలిపిన
ఉగాది పచ్చడిలా ఎరుక జేస్తది….

బలగం ప్రేమానురాగాల
అనుబంధం
బలగం పల్లె జీవన
విధానానికి తార్కాణం
బలగం తెలంగాణ
యాస భాషల మమకారం
బలగం ఈ భూమిపై
కదలాడే ఓ సజీవ చిత్రం

• ఉప్పరి తిరుమలేశ్‌
  9618961384