గీతా గాగ్రా

అంబానీ ఇంట పెండ్లిసందడి ముగిసి వారం గడిచినా.. ఆ వేడుక ముచ్చట్లు నెట్టింట ఇంకా చక్కర్లు కొడుతున్నాయి. నీతా అంబానీ చీరకట్టు..

అంబానీ ఇంట పెండ్లిసందడి ముగిసి వారం గడిచినా.. ఆ వేడుక ముచ్చట్లు నెట్టింట ఇంకా చక్కర్లు కొడుతున్నాయి. నీతా అంబానీ చీరకట్టు.. ఈశా అంబానీ ధరించిన జాకెట్టు.. ఇవన్నీ ఇంకా వైరల్‌ అవుతున్నాయి. నూతన వధూవరుల కన్నా ఈ తల్లీకూతుళ్ల ముస్తాబుపైనే నెట్టింట ముచ్చట్లు నడుస్తున్నాయి. ఈ వేడుకలో పూటపూటకూ సరికొత్త ఆహార్యంతో అలరించిన ఈశా.. శివశక్తి పూజ సందర్భంగా ధరించిన లెహంగా టాక్‌ ఆఫ్‌ ద సోషల్‌ మీడియాగా మారింది.

ఈ కార్యక్రమానికి అంబానీ పరివారమంతా సంప్రదాయ దుస్తుల్లో హాజరైంది. ఈశా ఆగ్రా తాజ్‌మహల్‌ కన్నా వేడుకైన గాగ్రా ధరించింది. దీనిపై అలనాటి అలంకారాలు, భారతీయ సంప్రదాయాన్ని చాటిచెప్పే చిత్తరువులు ముద్రించారు.

ఈ ప్రత్యేకతలు చాలవన్నట్టు గీతాసారాన్ని చాటిచెప్పే ‘కర్మణ్యేవాధికారస్తే మా ఫలేషు కదాచన, మా కర్మ ఫలహేతుర్భూః మా తే సంగో‚స్తకర్మణి’ అనే శ్లోకం కూడా గాగ్రాపై లిఖించి ఉంది. ‘పని చెయ్‌.. ఫలితం ఆశించకు’ అని ఈ శ్లోకార్థం. సిరిగలవారు ఏం చేసినా చెల్లున్‌! అయితే, ఒంటిమీద ధరించే దుస్తులపై గీతాశ్లోకం రాయడం ఏంటని కొందరు నెటిజన్లు పెదవి విరుస్తున్నారు.