పంచాయతీ అధికారి పర్సంటేజీల దందా ?

గ్రామ పంచాయతీల అభివృద్ధి నిధులపై ఓ అధికారి కన్నుపడింది. ప్రజాప్రతినిధులు, కార్యదర్శుల నిబంధనల ప్రకారం చేసిన పనులకు సైతం పర్సంటేజీ ముట్టచెప్పందే బిల్లులు క్లియర్ కావడం లేదనే ఆరోపణలు వెల్లువెత్తుతున్నాయి. బూర్గంపహాడ్ మండలంలో విధులు నిర్వహిస్తున్న ఓ ఉన్నతాధికారి తీరు...

బూర్గంపహాడ్, అక్టోబర్ 15 : గ్రామ పంచాయతీల అభివృద్ధి నిధులపై ఓ అధికారి కన్నుపడింది. ప్రజాప్రతినిధులు, కార్యదర్శుల నిబంధనల ప్రకారం చేసిన పనులకు సైతం పర్సంటేజీ ముట్టచెప్పందే బిల్లులు క్లియర్ కావడం లేదనే ఆరోపణలు వెల్లువెత్తుతున్నాయి. బూర్గంపహాడ్ మండలంలో విధులు నిర్వహిస్తున్న ఓ ఉన్నతాధికారి తీరు ఈ వ్యవహారంలో ప్రస్తుతం తీవ్ర చర్చనీయాంశంగా మారింది. పలు గ్రామ పంచాయతీల్లో అభివృద్ధి పనులకు సంబంధించిన బిల్లుల చెల్లింపు విషయంలో సదరు అధికారి తీవ్ర జాప్యం చేస్తున్నారనే ఆరోపణలు లేకపోలేదు. ప్రస్తుతం మండలంలో ఓ పంచాయతీకి సంబంధించి నిధుల లావాదేవీలు, బిల్లుల క్లియరెన్స‌న్‌కు ఫైల్ వెళ్లగా ముడుపులు అందిన తర్వాతే ముందుకు కదులుతామన్న రీతిలో సదరు అధికారి వ్యవహరిస్తున్నారనే ఆరోపణలు బహిరంగంగా వినవస్తున్నాయి. నా వాటా నాకు చేరితేనే సంతకం పెడతా… లేదంటే అభ్యంతరాల పేరుతో ఫైల్ పెండింగ్ లో పెడతా మంటూ నేరుగా చెబుతున్నట్లు పంచాయతీ వర్గాలు ఆవేదన వ్యక్తం చేస్తున్నాయి.

ఆ అధికారి గతంలో పని చేసిన ప్రదేశంలో ఇదే తీరుతో ఉన్నారని, పంచాయతీ కార్యదర్శులను మానసికంగా, ఆర్థికంగా తీవ్ర ఇబ్బందులకు గురిచేసిన చరిత్ర ఉందనే ఆరోపణలూ లేకపోలేదు. బిల్లుల విషయంలో కార్యదర్శులనే కాకుండా సర్పంచులు, ఉప సర్పంచుల‌ను సైతం ఇబ్బందులపాలు చేస్తున్నారని విశ్వసనీయ సమాచారం. సంబంధిత కలెక్టర్, జిల్లా పంచాయతీ అధికారి స్పందించి సదరు అధికారి వ్యవహారంపై విచారణ చేసి చర్యలు తీసుకోవాలని స్థానికులు కోరుతున్నారు. ఈ విషయంపై ఎంపీడీవోను ‘నమస్తే తెలంగాణ’ వివరణ కోరగా అభివృద్ధి పనుల విషయంలో స‌ద‌రు అధికారి బిల్లుల చెల్లింపులో పర్సంటేజీ తీసుకుంటున్నట్లు ప‌లు పంచాయతీల్లోని సర్పంచుల నుండి తన దృష్టికి వచ్చిందని, ఈ విషయాన్ని ఉన్నతాధికారులకు ఫిర్యాదు చేస్తానని వివరణ ఇచ్చారు.