Rajanna Sircilla | చెరువులో మునిగి యువకుడి మృతి.. తండ్రికి దూరమైన ముగ్గురు చిన్నారులు!

Rajanna Sircilla | రాజన్న సిరిసిల్ల జిల్లాలో విషాదం చోటుచేసుకుంది. చేపలు, తాబేళ్లు పట్టేందుకు స్నేహితులతో కలిసి చెరువులోకి వెళ్లిన ఓ యువకుడు నీట మునిగి ప్రాణాలు కోల్పోయాడు.

Rajanna Sircilla | ఎల్లారెడ్డిపేట, అక్టోబర్‌ 10: రాజన్న సిరిసిల్ల జిల్లాలో విషాదం చోటుచేసుకుంది. చేపలు, తాబేళ్లు పట్టేందుకు స్నేహితులతో కలిసి చెరువులోకి వెళ్లిన ఓ యువకుడు నీట మునిగి ప్రాణాలు కోల్పోయాడు. ఎల్లారెడ్డిపేట మండలం వెంకటాపూర్‌ గ్రామ శివారులో ఈ ఘటన జరిగింది. కుటుంబానికి పెద్ద దిక్కుగా ఉన్న యువకుడు మృతి చెందడంతో భార్య, ముగ్గురు చిన్నారులు దిక్కుతోచని స్థితిలో పడ్డారు.

వెంకటాపూర్‌ గ్రామానికి చెందిన మోతే ఎల్లయ్య, ఎల్లవ్వ దంపతుల కుమారుడు మోతే కిరణ్‌ స్నేహితులతో కలిసి చేపలు, తాబేళ్లు పట్టేందుకు చెరువులోకి దిగాడు. ఈ క్రమంలో లోతైన ప్రాంతానికి వెళ్లడంతో నీట మునిగిపోయాడు. కిరణ్‌ ఆచూకీ కోసం శుక్రవారం గాలింపు చేపట్టినా ఫలితం లేకపోయింది. శనివారం ఉదయం అతడి మృతదేహాన్ని వెలికితీశారు.

సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. కిరణ్‌కు భార్యతోపాటు ముగ్గురు చిన్నపిల్లలు ఉన్నారు. కుటుంబానికి ఆధారంగా ఉన్న అతడు మృతి చెందడంతో భార్యాపిల్లలు కన్నీరుమున్నీరవుతున్నారు. ఈ ఘటనతో వెంకటాపూర్‌ గ్రామంలో విషాదం అలుముకుంది.