అల్విన్‌ ఫ్రిడ్జ్‌ @ 60 ఏండ్లు

సాధారణంగా ఒక రిఫ్రిజిరేటర్‌ పది, పన్నెండేండ్లు మన్నికగా ఉంటుంది. మహా అయితే ఓ పదిహేనేండ్లు పనిచేస్తుంది. కానీ, జగిత్యాలలోని శ్రీ వెంకటేశ్వర మెడికల్‌ షాపులో ఉన్న ఫ్రిడ్జ్‌ మాత్రం ఇప్పటికీ చక్కగా పనిచేస్తున్నది.

• ఇప్పటికీ చెక్కుచెదరని నిజాం కంపెనీ రిఫ్రిజిరేటర్‌

సాధారణంగా ఒక రిఫ్రిజిరేటర్‌ పది, పన్నెండేండ్లు మన్నికగా ఉంటుంది. మహా అయితే ఓ పదిహేనేండ్లు పనిచేస్తుంది. కానీ, జగిత్యాలలోని శ్రీ వెంకటేశ్వర మెడికల్‌ షాపులో ఉన్న ఫ్రిడ్జ్‌ మాత్రం ఇప్పటికీ చక్కగా పనిచేస్తున్నది. ఒకటికాదు రెండు కాదు అర్ధ శతాబ్దాన్ని పూర్తి చేసుకొని 60వ ఏటకు చేరువవుతున్నది. అయితే ఇది ఎంతో గుర్తింపు పొందిన అల్విన్‌ కంపెనీ బ్రాండ్‌ కావడంతో ఇప్పటికీ చెక్కు చెదరకుండా ఉన్నదని మెడికల్‌ షాప్‌ను ప్రారంభించిన గరిపెల్లి వెంకటరాములు వారసులు చెబుతున్నారు.

తమ తండ్రి ఈ ఫ్రిడ్జ్‌ను 1965 ప్రాంతంలో 1099కి కొనుగోలు చేశాడని, అప్పటి నుంచి ఇప్పటిదాకా పనిచేస్తూనే ఉన్నదని, ఇంత వరకు రిపేర్‌ రాలేదని చెబుతున్నారు. ఈ షాప్‌నకు 55 ఏండ్లుగా వస్తున్నానని, ఫ్రిజ్‌ను చూసినప్పుడల్లా ఆశ్చర్యం కలుగుతున్నదని రిటైర్డ్‌ టీచర్‌ మ్యాడారం రాములు చెబుతున్నారు. హైదరాబాద్‌ అల్విన్‌ లిమిటెడ్‌ కంపెనీకి ఘనమైన చరిత్ర ఉన్నదని, దీనిని ఏడో నిజాం మీర్‌ ఉస్మాన్‌ అలీఖాన్‌ 1942లో ప్రారంభించారని గుర్తు చేశారు.

– జగిత్యాల, ఏప్రిల్‌ 17 (నమస్తే తెలంగాణ)