Zelenskyy : నాటో సభ్యత్వం(NATO membership)పై ఉక్రెయిన్ అధ్యక్షుడు వ్లాదిమిర్ జెలెన్స్కీ(Zelenskyy) కీలక వ్యాఖ్యలు చేశాడు. నాటో మెంబర్షిప్ విషయమై జూలై కల్లా స్పష్టమైన ప్రకటనను కీవ్ కోరుకుంటుందని ఆయన అన్నాడు. యూరోపియన్ యూనియన్లో ఉక్రెయిన్ చేరికపై కూడా పురోగతి ఆశిస్తున్నటు జెలెన్స్కీ వెల్లడించాడు. ‘ఇది నిర్ణయాలు తీసుకోవాల్సిన సంవత్సరం. జూలై నెలలో మాల్డోవాలో జరగనున్న నాటో సమావేశంలో ఉక్రెయిన్ సభ్యత్వం గురించి స్పష్టమైన, సానుకూలమైన నిర్ణయం వెలువరించాలి.
అంతేకాదు రష్యాతో యుద్ధాన్ని ముగించడానికి మేము శాంతి సమావేశం కోసం సన్నద్ధమవుతున్నాం. దానివల్ల ప్రపంచమంతా శాంతి సందేశాన్ని(సూత్రాన్ని) ఆచరణలోకి తెచ్చేలా చేస్తుంది’ అని జెలెన్స్కీ తెలిపాడు. నాటో సమావేశంలో 40 యూరోపియన్ దేశాల ప్రతినిధులు పొల్గొననున్నారు. అయితే.. ఉక్రెయిన్ కోరుతున్న శాంతి సమావేశం నిర్వహణపై నాటో ఇంతవరకు నిర్ణయం వెల్లడించలేదు.
ఉక్రెయిన్ నాటోలో చేరడంపై అభ్యంతరం వ్యక్తం చేసిన రష్యా ఏకంగా యుద్ధానికి తెరలేపింది. ఇరుదేశాల దాడుల్లో ఇప్పటికే లక్షల మంది ప్రాణాలు కోల్పోయారు. దాంతో, ఉక్రెయిన్ యుద్ధానికి ముగింపు పలకాలని భావిస్తోంది. అందుకని నాటో సమావేశంలో శాంతి సమావేశం నిర్వహించాలని పట్టుపడుతోంది. జెలెన్స్కీ 10 పాయింట్లతో కూడిన పీస్ ఫార్మూలాను ప్రతిపాదించాడు. వాటిలో ఏం ఉందంటే..? ఉక్రెయిన్ నుంచి రష్యా సైనిక దళాలు వెనక్కి వెళ్లిపోవాలి. అంతేకాదు రష్యా ఆర్మీని దేశం దాటించేందుకు యుద్ధ విమానాల సాయం తీసుకుంటామని చెప్పాడు. అందుకనే ఆయన నాటోలో శాంతి సమావేశం పెట్టాలని ఒత్తిడి తెస్తున్నాడు.