World Heart Day : గుండెను కాపాడుకుందాం.. హాయిగా జీవిద్దాం

World Heart Day : నేడు ప్రపంచ హృదయ దినోత్సవం. ప్రపంచ గుండె సమాఖ్య ఏటా సెప్టెంబర్ 29 న ప్రపంచ గుండె దినోత్సవాన్ని...

September 29, 2021 / 12:48 PM IST

World Heart Day : గుండెను కాపాడుకుందాం.. హాయిగా జీవిద్దాం

(World Heart Day) నేడు ప్రపంచ హృదయ దినోత్సవం. ప్రపంచ గుండె సమాఖ్య ఏటా సెప్టెంబర్ 29 న ప్రపంచ గుండె దినోత్సవాన్ని జరుపుతుంది. గుండె జబ్బుల గురించి ప్రజలకు అవగాహన కల్పించడానికి ఈ రోజున వివిధ కార్యక్రమాలను నిర్వహిస్తారు. 1999 లో ప్రపంచ ఆరోగ్య సంస్థ సహకారంతో ప్రారంభించారు. 2000 సెప్టెంబర్ 24 న తొలి ప్రపంచ గుండె దినోత్సవాన్ని జరుపుకున్నారు. ఇది 2011 వరకు కొనసాగింది. అనంతరం సెప్టెంబర్‌ 29 కి మార్చారు. హృదయ సంబంధ వ్యాధులపై పోరాడటానికి అవగాహన వ్యాప్తి చేయడానికి వైద్య సంస్థలు కృషి చేస్తున్నాయి.

గుండె జబ్బుల కారణంగా ప్రతి సంవత్సరం దాదాపు రెండు కోట్ల మంది మరణిస్తున్నారు. ఇండియన్ హార్ట్ అసోసియేషన్ ప్రకారం, గుండెపోటు ఉన్న 50 శాతం మంది భారతీయ పురుషులు 50 ఏండ్లలోపు వారే. 25 శాతం మంది 40 ఏళ్లలోపు వారు. మెడికల్ సర్టిఫికేషన్ ఆఫ్ కాజ్ ఆఫ్ డెత్ ప్రకారం, గుండె జబ్బుల కారణంగా 57 శాతం మరణాలు 25-69 సంవత్సరాల మధ్య ఉన్న గుండె రోగాల వల్ల జరుగుతున్నాయి. 1990 లో దేశంలో గుండె రోగుల సంఖ్య కేవలం 2.57 కోట్లుగా ఉండగా.. ప్రస్తుతం ఈ సంఖ్య 54 కోట్లకు పైగా పెరిగింది. భారతదేశంలో వివిధ వ్యాధుల కారణంగా మరణించినవారిలో 28.1 శాతం మరణాలు గుండె జబ్బుల కారణంగా జరుగుతున్నాయి.

మనం తీసుకునే ఆహారం, రక్తపోటు, వాయు కాలుష్యం, హై కొలెస్ట్రాల్‌, సిగరెట్‌ స్మోకింగ్‌, ఊబకాయం కారణంగా గుండె జబ్బులు వస్తున్నందున వీటిపై దృష్టి సారించడం ముఖ్యం. గుండె ఆరోగ్యంగా ఉండాలంటే జీవనశైలిని మార్చుకోవాలి. నిత్యం వ్యాయామం చేయడంతో పాటు గంట పాటు నడక, 8 గంటలకు తక్కువ కాకుండా నిద్రపోవడం అలవాటు చేసుకోవాలి. ఇంటి పరిసరాలను పరిశుభ్రంగా ఉంచుకోవడంతోపాటు శుభ్రమైన ఆహారం, నీటిని తీసుకోవాలి.