Supermarket: సూప‌ర్‌మార్కెట్‌లో పైక‌ప్పు కూలి 38 మందికి గాయాలు

Supermarket: సూప‌ర్‌మార్కెట్‌లో పైక‌ప్పు కూలిన ఘ‌ట‌న‌లో 38 మంది గాయ‌ప‌డ్డారు. ఈ సంఘ‌ట‌న ద‌క్షిణ కొరియాలోని డేగూ సిటీ మాల్‌లో జ‌రిగింది. ప్ర‌స్తుతం 9 మంది వివిధ ఆస్ప‌త్రుల్లో చికిత్స పొందుతున్నారు.

సియోల్ : ద‌క్షిణ‌కొరియాలోని ఓ షాపింగ్ మాల్‌(Supermarket)లో పైక‌ప్పు కూల‌డంతో సుమారు 38 మంది గాయ‌ప‌డ్డారు. ఈ ఘ‌ట‌న డేగూ సిటీలో జ‌రిగింది. ప్లాస్ట‌ర్ సీలింగ్ కూలిన‌ట్లు అధికారులు చెప్పారు. ఈ ఘ‌ట‌న‌లో చిక్కుకున్న 66 మందిని సుర‌క్షితంగా త‌ర‌లించిన‌ట్లు డేగూ అగ్నిమాప‌క శాఖ పేర్కొన్న‌ది. ఇవాళ ఉద‌యం 10.16 నిమిషాల‌కు ఈ ఘ‌ట‌న జ‌రిగింది. వివిధ ఆస్ప‌త్రుల్లో కొంద‌రు చికిత్స పొందుతున్నారు. గాయ‌ప‌డ్డ‌వారి సంఖ్య పెరిగే అవ‌కాశం ఉంద‌ని, కానీ తీవ్రంగా గాయ‌ప‌డ్డ వారు ఎవ‌రూ లేర‌ని అధికారులు చెప్పారు. నాలుగు అంత‌స్తుల బిల్డింగ్‌లో రెండో అంత‌స్తు పైక‌ప్పు ప్లాస్ట‌రింగ్ కూలింద‌ని ఫైర్ డిపార్ట్‌మెంట్ ఆఫీస‌ర్ యూన్ జాంగ్ మి తెలిపారు. అయితే దేని వ‌ల్ల పైక‌ప్పు కూలిందో తేల్చలేదు. ఈ ఘ‌ట‌న‌లో గాయ‌ప‌డ్డ‌వారికి మెరుగైన చికిత్స అందించాల‌ని ద‌క్షిణ కొరియా అధ్య‌క్షుడు లీ జే మ‌యుంగ్ తెలిపారు.