జంతురాజ్యం చాలా ఆసక్తికరంగా ఉంటుంది. వింత జంతువుల ఫొటోలు, ఫన్నీ వీడియోలు నెట్టింట వైరల్ అవుతుంటాయి. అవి చూడడానికి మనోహరంగా ఉంటాయి. కాగా, దక్షిణాఫ్రికాలోని అడవిలో అత్యంత అరుదైన, వికృతమైన పాము ఒకటి కనిపించింది. దీని ఫొటోలు ప్రస్తుతం ఆన్లైన్లో చక్కర్లు కొడుతున్నాయి.
పాముల సంరక్షకుడు నిక్ ఎవాన్స్ ఈ రెండు తలల సదరన్ బ్రౌన్ ఎగ్-ఈటర్ ఫొటోలను ఫేస్బుక్లో షేర్ చేశాడు. ఓ వ్యక్తి తన గార్డెన్లో ఈ పాము కనిపించగా పట్టుకునేందుకు తనను పిలిచాడని, తీరా వెళ్లి చూస్తే ఈ అరుదైన పాము కనిపించిందని నిక్ తెలిపాడు. ఇది హానిచేయని జాతి అని, చాలా అరుదైనదని పేర్కొన్నాడు. ఈ పామును సీసాలో బంధించి తీసుకొచ్చినట్లు తెలిపాడు. ఈ వికృతమైన పామును చూడడం చాలా వింతగా అనిపించిందని, దీని తలలు ఒకదానికొకటి వ్యతిరేక దిశలో వెళ్లేందుకు ప్రయత్నిస్తున్నాయని చెప్పాడు. ప్రస్తుతం దీన్ని తానే సంరక్షిస్తున్నట్లు తెలిపాడు.