లిజ్‌ ట్రస్‌కు పదవీ గండం!

బ్రిటన్‌లో మరోసారి రాజకీయ సంక్షోభం తలెత్తనున్నదా? ఇటీవలే కొత్త ప్రధానిగా ఎన్నికైన లిజ్‌ ట్రస్‌కు పదవీ గండం పొంచి ఉన్నదని రాజకీయ విశ్లేషకులు పేర్కొంటున్నారు. ట్రస్‌ ప్రవేశపెట్టిన మినీ బడ్జెట్‌,

లండన్‌, అక్టోబర్‌ 16: బ్రిటన్‌లో మరోసారి రాజకీయ సంక్షోభం తలెత్తనున్నదా? ఇటీవలే కొత్త ప్రధానిగా ఎన్నికైన లిజ్‌ ట్రస్‌కు పదవీ గండం పొంచి ఉన్నదని రాజకీయ విశ్లేషకులు పేర్కొంటున్నారు. ట్రస్‌ ప్రవేశపెట్టిన మినీ బడ్జెట్‌, ఆర్థిక విధానాలపై వ్యతిరేకతతో పాటు ఆర్థిక మంత్రి క్వాసీ క్వార్టెంగ్‌ను తొలగించిన నేపథ్యంలో ట్రస్‌పై అధికార టోరీ పార్టీలోని కొంత మంది సీనియర్‌ ఎంపీలు తిరుగుబావుటాకు సిద్ధమవుతున్నట్టు తెలుస్తున్నది. ప్రధానిగా ట్రస్‌ను తప్పించి.. ఆ స్థానంలో రిషి సునాక్‌ లేదా పెన్నీ మోర్డాంట్‌ను కూర్చొబెట్టాలని పావులు కదుపుతున్నట్టు బ్రిటిష్‌ మీడియా నివేదికలు చెప్తున్నాయి. లిజ్‌ ట్రస్‌ను ప్రధానిగా ఎన్నుకొని తప్పుడు నిర్ణయం తీసుకున్నామని ఎన్నికల్లో పాల్గొన్న 62 శాతం మంది ఓటర్లు పేర్కొన్నారని ‘యూ గవ్‌’ సర్వే శుక్రవారం వెల్లడించింది. మరోవైపు లీసెస్టెర్‌, బర్మింగ్‌హామ్‌ హింసాకాండ నేపథ్యంలో 180 బ్రిటిష్‌ ఇండియన్‌ హిందూ సంఘాలు ప్రధాని ట్రస్‌కు లేఖ రాశాయి. ప్రభుత్వం జోక్యం చేసుకొని హిందూ కమ్యూనిటీకి రక్షణ కల్పించాలని కోరాయి.