ఐక్యరాజ్యసమితి మానవాధికారాల కౌన్సిల్ వేదికగా రష్యా ఒంటరైంది. రష్యా విదేశాంగ మంత్రి లావ్రోవ్ ఉపన్యాసం ప్రారంభమవ్వడంతోనే పలు దేశాల నేతలు వాకౌట్ చేసి వెళ్లిపోయారు. ఆయన మాట్లాడిన వీడియోను అధికారులు ప్లే చేయడమే ఆలస్యం.. పలు దేశాల నేతలు సమావేశం నుంచి బాయ్కాట్ చేసి వెళ్లిపోయారు. ఇలా చేయడం ద్వారా రష్యాపై ఒత్తిడి పెంచినట్లవుతుందని, రష్యా కాస్త వెనక్కి తగ్గే అవకాశాలున్నాయని ఆ నేతలు పేర్కొన్నట్లు తెలుస్తోంది. ఈ సందర్భంగా ఉక్రెయిన్ రాయబారి యెవహోనియా ధన్యవాదాలు తెలిపారు. అయితే యమన్, సిరియా, వెనిజులా, ట్యూనిషియా ప్రతినిధులు మాత్రం రష్యా విదేశాంగ మంత్రి వీడియోను విన్నారు.
ఫ్రాన్స్ రాయబారి జెరోమో బెనాఫాంట్ మాట్లాడుతూ.. ఉక్రెయిన్లో మానవహక్కుల ఉల్లంఘన జరుగుతోందని మండిపడ్డారు. ఉక్రెయిన్లో పెద్ద సంఖ్యలో ప్రజలు చనిపోతున్నారని, మానవహక్కుల ఉల్లంఘన కూడా అదే రీతిలో జరుగుతోందని ఆక్షేపించారు. ఇలా వాకౌట్ చేయడం ద్వారా ఉక్రెయిన్ ప్రజలకు తామున్నామన్న భరోసా ఇచ్చినట్లవుతుందన్నారు.