Visit:
మన్రోవియా: ఆఫ్రికా దేశమైన లైబీరియా (Liberia) నూతన అధ్యక్షుడిగా జోసఫ్‌ బోయకై (Joseph Boakai) ఎన్నికయ్యారు. మాజీ ఫుట్‌బాల్‌ స్టార్‌, ప్రస్తుత అధ్యక్షుడు జార్జ్‌ వీహ్‌పై (George Weah) 20,567 ఓట్ల తేడాతో ఆయన విజయం సాధించారు. అధ్యక్ష ఎన్నికల కౌంటింగ్‌ పూర్తయిన తర్వాత జాతీయ ఎన్నికల సంఘం (NEC) ఈ మేరకు ప్రకటించింది. అధ్యక్ష ఎన్నికల్లో వీహ్‌కు 49.36 శాతం ఓట్లు రాగా, బోకాయ్ 50.64 శాతం ఓట్లతో గెలుపొందారని వెల్లడించింది. వీహ్‌ ఇప్పటికే తన ఓటమిని అంగీకరించారు.
ఆరేండ్ల క్రితం జరిగిన అధ్యక్ష ఎన్నికల్లో వీహ్‌ విజయం సాధించారు. దీంతో లైబీరియా అధ్యక్షుడైన తొలి ఆఫ్రికన్‌ ఫుట్‌బాల్‌ ప్లేయర్‌గా (African Footballer) రికార్డు సృష్టించారు. అయితే తనపై పెట్టుకున్న ప్రజల నమ్మకాన్ని ఈ ఫిఫా వరల్డ్‌ ప్లేయర్‌, బాలన్‌ డీఓఆర్‌ అవార్డుల విజేత నిలబెట్టుకోలేకపోయారు. ఆయన ప్రభుత్వం అవినీతిలో కూరుకుపోయిందన్న ఆరోపణలు ఉన్నాయి. వీహ్‌ కాలంలో దేశంలో ఎలాంటి మార్పూ రాలేని ప్రజలు అసంతృప్తితో ఉన్నారు. ఈ నేపథ్యంలోనే తాజాగా జరిగిన ఎన్నికల్లో ఆయన ఓటమిపాలయ్యారు. కాగా, నూతన అధ్యక్షుడికి.. వీవ్‌ శుభాకాంక్షలు తెలిపారు. తన పార్టీ ఓడిపోయిందని, లైబీరియా ప్రజలు గెలుపొందారని చెప్పారు. ప్రతిఒక్కరు మార్పును అంగీకరించాల్సిందేనని పార్టీ కార్యకర్తలకు సూచించారు.
