Canada | ఒట్టావా: తమ వారి అంత్యక్రియలను గౌరవంగా జరిపించి తుది వీడ్కోలు పలకాలని ప్రతి కుటుంబం అనుకుంటుంది. కానీ, కెనడాలో మాత్రం కొన్ని కుటుంబాలు అయిన వారి మృతదేహాలను అనాథ శవాలుగా వదిలేసే దయనీయ పరిస్థితులు నెలకొన్నాయి. భారీగా పెరిగిన అంత్యక్రియల ఖర్చులను భరించలేక మృతులు తమ వారేనని తెలిసినా మృతదేహాలను తీసుకోవడం లేదు. దీంతో దేశంలోని అన్ని ప్రావిన్సుల్లో అనాథ మృతదేహాల సంఖ్య పెరుగుతున్నది.
అంటారియో ప్రావిన్సులో 2013లో 242 అనాథ మృతదేహాలను గుర్తించగా, 2023లో 1,183 గుర్తించారంటే పరిస్థితి అర్థం చేసుకోవచ్చు. మృతుల వద్ద ఉన్న ఆధారాలతో కుటుంబసభ్యులను గుర్తించినా.. అంత్యక్రియల ఖర్చులు భరించలేక 2023లో 24 శాతం మృతదేహాలను తీసుకెళ్లలేదు. శ్మశాన వాటికల్లో మృతదేహాల ఖననానికి భారీగా డబ్బు చెల్లించాల్సి వస్తున్నది.
అంత్యక్రియల ప్రక్రియకు కూడా ఖర్చులు పెరిగిపోయాయి. ఒక్కో ప్రాంతంలో ఈ ఖర్చు ఒక్కోలా ఉంది. గ్రేటర్ టొరంటో నగరంలో అయితే అంత్యక్రియల ఖర్చు దాదాపుగా 34 వేల డాలర్లు అవుతున్నది. అంటే, మన కరెన్సీలో అక్షరాల రూ.27 లక్షలు. దీనికి అదనంగా వ్యాన్, ఇతర ఖర్చులు కలిపి మొత్తం రూ.30 లక్షలు అవుతున్నది. ఈ ఖర్చును భరించలేని కుటుంబాలు తమ వారి మృతదేహాలను బయటే వదిలేస్తున్నారు.