తుపాకుల నియంత్రణకు అమెరికాలో చట్టం

• అధ్యక్షుడు బైడెన్‌ సంతకం

వాషింగ్టన్‌, జూన్‌ 26: తుపాకుల వాడకంపై నియంత్రణ కోసం అమెరికా సర్కారు చట్టం చేసింది. బిల్లుపై అధ్యక్షుడు బైడెన్‌ శనివారం సంతకం చేశారు. ‘ఈ చట్టం ఎంతో మంది ప్రాణాలను కాపాడుతుంది’ అన్నా రు. అయితే, తాను కోరుకొంటున్న అన్ని అంశాలు ఈ చట్టంలో లేవని పేర్కొన్నారు. కానీ ప్రస్తుత పరిస్థితుల్లో ఈ చట్టం సరిపోతుందని వ్యాఖ్యానించారు. బిల్లుకు రిపబ్లికన్లు కూడా మద్దతివ్వడం చరిత్రాత్మకం అన్నారు. యువకులు, నేరపూరిత స్వభావం ఉన్నవారికి తుపాకులు తేలిగ్గా లభించకుండా ఈ చట్టం నియంత్రిస్తుంది. ప్రమాదకరమైన వ్యక్తులుగా భావిస్తున్నవారి నుంచి తుపాకులు స్వాధీనం చేసుకోవడానికి అధికారం కల్పిస్తుంది. తుపాకుల అక్రమ రవాణాను నిరోధిస్తుంది. ఈ బిల్లు శుక్రవారం ప్రతినిధుల సభలో 234-193 ఓట్ల తేడాతో పాసైంది. అంతకుముందు రోజే సెనేట్‌లో ఈ బిల్లుకు ఆమోదముద్ర పడింది.