ఇమ్రాన్ ఖాన్ ప్రధాని పదవి నుంచి దిగిపోయి.. నాలుగు రోజులైంది. పాక్ నూతన ప్రధానిగా షాహబాజ్ షరీఫ్ ఎన్నికయ్యారు కూడా. షాహబాజ్ ఎన్నికైనా… ఇమ్రాన్ ఖాన్ సోషల్ మీడియాపై తన ఆధిపత్యాన్ని సడలించుకోవడం లేదు. పీఎంవో కార్యాలయ ట్విట్టర్ హ్యాండిల్తో పాటు ఇతర సామాజిక మాధ్యమాల అకౌంట్లను ప్రస్తుత ప్రధానికి బదిలీ చేయకుండా మంకుపట్టు పడుతున్నారు.
నూతన ప్రధానిగా షాహబాజ్ ఎన్నికైనా…. మాజీ ప్రధాని ఇమ్రాన్ మాత్రం సోషల్ మీడియా అకౌంట్లను వారికి బదిలీ చేయకుండా ఆపేస్తున్నారని, అసలు యాక్సిస్ ఇవ్వడం లేదని పాక్ మీడియా పేర్కొంది. పీఎంవో అధికారిక ట్విట్టర్ పేజీ అందుబాటులో లేకపోవడంతో నూతన ప్రధాని షాహబాజ్ ఓ కొత్త ట్విట్టర్ పేజీనే సృష్టించుకున్నారు. దానికి @pmo_pk ఐడీ పెట్టారు. పీఎంవో అధికార ట్విట్టర్తో సహా.. ఇతర సోషల్ మీడియా అకౌంట్లను బదిలీ చేసేందుకు మాజీ ప్రధాని ఇమ్రాన్ నిరాకరిస్తున్నారు.
గతంలో పీఎంవో ట్విట్టర్ అకౌంటర్ @pakpmo పేరు మీద ఉండేది. దీనిని పాక్ సమాచార మంత్రిత్వ శాఖకు చెందిన ఇమ్రాన్ గజాలీ అనే అధికారి చూసేవారు. దీనికి 3.5 కోట్ల మంది ఫాలోవర్స్ ఉన్నారు. ఇమ్రాన్ సర్కార్ పడిపోయిన తర్వాత, ఈ అకౌంట్ను మార్చేసి, 2018 నుంచి 2022 వరకూ ఉన్న ప్రధానిది అని పేర్కొన్నారు.