China Covid | కరోనా పుట్టినిళ్లు చైనాలో మహమ్మారి మరోసారి విజృంభిస్తోంది. ఆ దేశంలో ప్రతిరోజూ లక్షల్లో పాజిటివ్ కేసులు నమోదవుతున్నాయి. దీంతో ప్రపంచాన్ని మరోసారి కొవిడ్ భయాలు వెంటాడుతున్నాయి. ఈ తరుణంలో మరోవార్త తీవ్ర ఆందోళన కలిగిస్తోంది. మరో 2-3 నెలల వరకు అక్కడ కొవిడ్ గరిష్ఠ స్థాయిలో ఉంటుందని అంటువ్యాధుల నిపుణులు అంచానా వేశారు. ఇది గ్రామీణ ప్రాంతాలకు కూడా వ్యాపించే అవకాశం చాలా ఎక్కువగా ఉందని హెచ్చరించారు.
ప్రస్తుతం డ్రాగన్ న్యూ ఇయర్ వేడుకలకు సిద్ధమవుతోంది. ఈ నెల 22వ తేదీన చైనీయులు కొత్త సంవత్సరంలోకి అడుగుపెట్టబోతున్నారు. గత మూడేళ్లుగా కొవిడ్ నిబంధనల మధ్య మగ్గిన చైనీయులు.. వేడుకలకు దూరంగా ఉన్నారు. ఇటీవల చైనా ప్రభుత్వం జీరో కొవిడ్ విధానాన్ని ఎత్తివేయడంతో కోట్లాది మంది సొంతూళ్లకు పయనమవుతున్నారు. ఈ నేపథ్యంలో వచ్చే రెండు, మూడు నెలలు కేసులు మరింత పెరిగే అవకాశం ఉన్నట్లు నిపుణులు అంచనా వేశారు. ప్రస్తుతం కరోనా వ్యాప్తిలో తీవ్రదశ ఇంకా ముగియలేదని అక్కడ అధికారి ఒకరు తెలిపారు. వైరస్ విషయంలో ఇప్పటి వరకు ప్రాధాన్యత అంతా నగరాలపైనే ఉందని చెప్పారు. అయితే, ఇప్పుడు గ్రామీణ ప్రాంతాలపైనా దృష్టి సారించాల్సిన అవసరం ఉందని తెలిపారు.