బీజింగ్: చైనాలో విమానం కుప్పకూలిన ఘటనలో ప్రమాదానికి గల కారణాలపై ఇప్పటికీ స్పష్టత రాలేదు. అయితే ఈ ప్రమాదానికి సంబంధించి మరో ముందడుగుపడింది. గత నాలుగు రోజులుగా యాక్సిడెంట్ జరిగిన గ్వాంగ్జీ పర్వత ప్రాంతాల్లో జల్లడపడుతున్న రెస్క్యూ సిబ్బందికి రెండో బ్లాక్ బాక్స్ (black box) లభించింది. దీనిద్వారా అసలు ప్రమాదం ఎలా జరిగింది, దానికి గల కారణాలు ఏంటనే విషయాలను తెలుసుకునే అవకాశం ఉన్నది. కాగా, విమానం కూలిపోయిన రెండు రోజుల తర్వాత అంటే గత బుధవారం అందులోని మొదటి బ్లాక్ బాక్స్ లభించింది. ప్రస్తుతం నిపుణులు దానిని డీకోడ్ చేసి విశ్లేషిస్తున్నారు.
ఈనెల 21న (సోమవారం) 132 మందితో వెళ్తున్న చైనా ఈస్టర్న్ ఎయిర్లైన్స్కు చెందిన బోయింగ్ 737 విమానం గ్వాంగ్జీలోని ఓ పర్వత ప్రాంతంలో కుప్పకూలింది. ప్రమాద సమయంలో విమానంలో 123 మంది ప్రయాణికులు, తొమ్మిది మంది సిబ్బంది ఉన్నారు. విమానం కూలిపోవడంతో అడవికి పెద్దయెత్తున మంటలు అంటుకొన్నాయి. భూమికి 26 వేల అడుగుల ఎత్తు పైనుంచి సరాసరిగా విమానం నేలపై కూలిపోయినట్టు ఆన్లైన్ ఫ్లైట్ ట్రాకర్ ‘ఫ్లైట్రాడార్24’ వెల్లడించింది. కేవలం మూడు నిమిషాల వ్యవధిలోనే ఇది జరిగినట్టు వివరించింది.