Bill Gates Divorce: గేట్స్ విడాకుల‌కు జ‌డ్జి ఆమోదం

న్యూయార్క్: బిల్ గేట్స్ ( Bill Gates ).. మెలిండా గేట్స్ ( Melinda Gates ) 27 ఏళ్ల వైవాహిక బంధానికి అధికారికంగా బ్రేక్ ప‌డింది. మెలిండా ద‌ర‌ఖాస్తు చేసుకున్న విడాకుల‌కు ( Divorce ) జ‌డ్జి ఆమోదం తెలిపారు. దీంతో మైక్రోసాఫ్ట్ వ్య‌వ‌స్థాప‌కుడు బిల్ గేట్స్ ఇప్పుడు సింగిల్ అయిపోయారు. తాము విడిపోతున్న‌ట్లు గేట్స్ దంప‌తులు మే నెల‌లో ప్ర‌క‌టించిన విష‌యం తెలిసిందే. వాషింగ్ట‌న్‌లోని కింగ్ కౌంటీ కోర్టులో మెలిండా గేట్స్ విడాకుల కోసం ద‌ర‌ఖాస్తు చేసుకున్నారు. 1987లో మైక్రోసాఫ్ట్ సంస్థ ఏర్పాటు స‌మ‌యంలో ఇద్ద‌రూ క‌లుసుకున్నారు. 1994లో వాళ్లిద్ద‌రు పెళ్లి చేసుకున్నారు.

కేవ‌లం విడిపోయే అంశంలో కుదుర్చుకున్న కాంట్రాక్టు ఆధారంగా డైవ‌ర్స్ ఇవ్వ‌డం జ‌రిగిన‌ట్లు తెలుస్తోంది. ఎవ‌రికి ఎవ‌రు భ‌ర‌ణం ఇచ్చే రీతిలో ఒప్పందం జ‌ర‌గ‌లేద‌ని కోర్టు డాక్యుమెంట్ల ద్వారా స్ప‌ష్టం అవుతున్న‌ది. విడాకుల ఆమోద ప‌త్రంలో ఆర్థిక అంశాల గురించి కూడా ఎటువంటి ప్ర‌స్తావ‌న లేదు. తాజా స‌మాచారం ప్ర‌కారం.. బిల్ గేట్స్ ఆస్థి సుమారు 152 బిలియ‌న్ల డాల‌ర్లు. అయితే డైవ‌ర్స్ త‌ర్వాత ఆ ఆస్తి ఒక‌వేళ ఇద్ద‌రికీ స‌మంగా పంపిణీ చేస్తే, అప్పుడు ఒక్కొక్క‌రి ఆస్థి సుమారు 76 బిలియ‌న్ల డాల‌ర్లు ఉంటుంద‌ని భావిస్తున్నారు.

50 బిలియ‌న్ డాల‌ర్ల గేట్స్ ఫౌండేష‌న్‌ను మాత్రం ఇద్ద‌రూ క‌లిసి మ‌రో రెండేళ్ల పాటు సంయుక్తంగా న‌డ‌ప‌నున్న‌ట్లు కోర్టు డాక్యుమెంట్ల ద్వారా తెలుస్తోంది. మెలిండా ఫ్రెంచ్‌ గేట్స్ విడాకులు కోసం వాషింగ్ట‌న్ కౌంటీ కోర్టులో ద‌ర‌ఖాస్తు చేసుకున్నారు. బిల్ గేట్స్ వ‌య‌సు 65 ఏళ్లు. మెలిండా వ‌య‌సు 56 ఏళ్లు.