Ana Obregon : ఓ తల్లి తన కొడుకు వీర్యంతో బిడ్డను కన్నది. ఫ్రీజ్ చేసి ఉంచిన తన కొడుకు వీర్యాన్ని వినియోగించి సరోగసీ విధానం ద్వారా ఆమె ఒక ఆడపిల్లకు జన్మనిచ్చింది. తాను తన కొడుకు వీర్యంతో బిడ్డను కన్నానని ప్రకటించి ఇప్పుడామె ప్రపంచాన్ని నివ్వెరపోయేలా చేసింది.
వివరాల్లోకి వెళ్తే.. స్పెయిన్ దేశానికి చెందిన ఒకప్పటి నటి అనా ఓబ్రెగాన్ (Ana Obregon) వయస్సు ప్రస్తుతం 69 ఏండ్లు. గతంలో ఆమెకు అలెస్ లెక్వియో (Aless Lequio) అనే ఒక కొడుకు ఉండేవాడు. అయితే అతడు క్యాన్సర్ బారినపడి 27 ఏండ్ల వయస్సులో మరణించాడు.
అయితే మరణానికి ముందే అతడు ఏదో ఒకరోజు తండ్రి కావాలన్న ఆశతో తన వీర్యాన్ని నిలువచేసి పెట్టాడు. కానీ తానొకటి తలిస్తే విధి మరోటి తలిచింది. వీర్యాన్ని ఓ సెంటర్లో భద్రపర్చిన తర్వాత అతడు క్యాన్సర్ బారినపడ్డాడు. ఆ తర్వాత కొన్నాళ్లకు మరణించాడు.
అయితే తండ్రి కావాలన్న ఆశతో అలెస్ లెక్వియో తన వీర్యాన్ని భద్రపర్చిన విషయం ఇంట్లో లభించిన రసీదు ద్వారా అనా ఓబ్రెగాన్కు తెలిసింది. దాంతో తండ్రి కావాలన్న తన కొడుకు కోరికను నెరవేర్చాలని నిర్ణయించుకుంది. అనుకున్నదే ఆలస్యం 2023లో సరోగసీ పద్ధతిలో కొడుకు వీర్యంతో ఆడపిల్లకు జన్మనిచ్చింది. తాజాగా ఆ విషయాన్ని బయటపెట్టింది.