TALIBAN| నెక్‌టైలపై నిషేధం విధించనున్న తాలిబన్లు.. కారణమిదే!

కాబూల్‌: అఫ్గానిస్థాన్‌లో బ్యూటీ పార్లర్లు, సెలూన్లపై ఇప్పటికే నిషేధం విధించిన తాలిబన్లు.. ఇప్పుడు నెక్‌టైలపై నిషేధం విధించేందుకు సిద్ధమయ్యారు. నెక్‌టైలు క్రైస్తవ శిలువను పోలి ఉండటమే ఇందుకు కారణం!

TALIBAN| కాబూల్‌: అఫ్గానిస్థాన్‌లో బ్యూటీ పార్లర్లు, సెలూన్లపై ఇప్పటికే నిషేధం విధించిన తాలిబన్లు.. ఇప్పుడు నెక్‌టైలపై నిషేధం విధించేందుకు సిద్ధమయ్యారు. నెక్‌టైలు క్రైస్తవ శిలువను పోలి ఉండటమే ఇందుకు కారణం! ఈ విషయాన్ని ‘ది ఇన్విటేషన్‌ అండ్‌ గైడెన్స్‌ డైరెక్టరేట్‌’ డైరెక్టర్‌ మొహమ్మద్‌ హషిమ్‌ షాహీద్‌ వ్రార్‌ వెల్లడించారు. అఫ్గాన్‌లో మతపరమైన విధానాలను నిర్ణయించే స్వతంత్ర సంస్థ ది ఇన్విటేషన్‌ అండ్‌ గైడెన్స్‌ డైరెక్టరేట్‌. టెలివిజన్‌ ప్రసంగంలో షాహీద్‌ వ్రార్‌ మాట్లాడుతూ.. ‘కొన్ని సార్లు నేను హాస్పిటల్స్‌, ఇతర ప్రాంతాలకు వెళ్లినప్పుడు ముస్లిం యువకులు నెక్‌టైలు ధరించడం చూశా. నెక్‌టైలకు మూలం ఏంటి? క్రైస్తవ శిలువ’ అని పేర్కొన్నారు. నెక్‌టైలపై నిషేధం విధిస్తే, పురుషుల వస్త్రధారణపై ఆంక్షలు విధించడం ఇదే తొలిసారి అవుతుంది.

2021 ఆగస్టులో అఫ్గానిస్థాన్‌ను హస్తగతం చేసుకున్నప్పటి నుంచి తాలిబన్లు మహిళలపై అనేక ఆంక్షలు విధిస్తున్న విషయం తెలిసిందే. బహిరంగ ప్రదేశాల్లో మహిళలు హిజాబ్‌ ధరించడాన్ని తప్పనిసరి చేశారు. మహిళలు యూనివర్సిటీ విద్యను అభ్యసించడాన్ని నిషేధించడంతోపాటు పాఠశాల విద్యపైనా అనేక ఆంక్షలు విధించారు. బ్యూటీ పార్లర్లను నిషేధించారు.