Rishi Sunak : బ్రిటన్ జాత్యహంకార దేశం కాదని తాను వంద శాతం నమ్ముతున్నాని ఆ దేశ ప్రధాని రిషి సునాక్ అన్నారు. లాథ్వియా రాజధాని రీగాలో ఆయన మీడియాతో మాట్లాడారు. యువరాజు హ్యారీ, ఆయన భార్య మేఘన్ మార్కెల్ పేరుతో వచ్చిన డాక్యుమెంటరీపై చెలరేగిన వివాదం గురించి విలేకరుల ప్రశ్నలకు రిషి ఈ విధంగా స్పందించారు. బ్రిటన్ను జాత్యహంకార దేశంగా పిలవడాన్ని ఆయన ఖండించారు. ‘భారత సంతతికి చెందిన తాను బ్రిటన్కు మొదటి ప్రధాని అయ్యానని, తాను ఈ మాట చెప్పడం వల్ల కచ్చితంగా ప్రభావం ఉంటుందని భావిస్తున్నా. మనదేశ సంస్కృతి, పోరాటపటిమ, అందం చూసి నేను గర్విస్తున్నా’ అని రిషి తెలిపారు.
నెట్ఫ్లిక్స్లో ఈమధ్యే ‘హ్యారీ అండ్ మేఘన్స్’ డాక్యుమెంటరీ ప్రసారం అయింది. టీవీ ప్రజెంటర్, కాలమిస్ట్ జెరెమీ క్లార్క్సన్ ఆ డాక్యుమెంటరీ మీద ‘ది సన్’ అనే వెబ్సైట్లో మేఘన్ పట్ల అసహ్యం వ్యక్తం చేస్తూ వ్యాసం రాశాడు. దాంతో అతని వార్త జాత్యహంకారం కిందకు వస్తుందని ఇండెపెండెంట్ ప్రెస్ స్టాండర్డ్స్ ఆరగ్గనేషన్లో 6 వేల ఫిర్యాదులు నమోదయ్యాయి. 60 మంది బ్రిటన్కు ఎంపీలు జెరెమీపై చర్యలు తీసుకోవాలని ది సన్ ఎడిటర్ విక్టోరియా న్యూటన్కు లెటర్ రాశారు. దాంతో జెరెమి క్షమాపణలు చెప్పాడు. ది సన్ కూడా అతడి వ్యాసాన్నివెబ్సైట్ నుంచి తొలగించింది. ఆఫ్రికా- అమెరికన్ మూలాలున్న మేఘన్ మార్కెల్, బ్రిటన్ యువరాజు హ్యారీ 2018 మేలో వివాహం చేసుకున్నారు. ఈ జంటకు ఇద్దరు పిల్లలు.