Pakistan Woman: డ్రెస్సుపై అర‌బిక్ అక్ష‌రాలు.. ఆ మహిళ‌ను చుట్టుముట్టిన‌ పాకిస్థానీలు

Pakistan Woman: ఓ మ‌హిళ వేసుకున్న డ్రెస్సుపై అనుమానం రావ‌డంతో.. ఆమెను కొంద‌రు చుట్టుముట్టేశారు. అర‌బిక్ భాష‌లో ప్రింట్ అయిన అక్ష‌రాల‌ను చూసి.. అవి ఖురాన్ వ‌చ‌నాలు అనుకున్నారు. ఆ మ‌హిళ దైవ దూష‌ణ‌కు పాల్ప‌డుతుంద‌ని భావించారు. కానీ అస‌లు నిజం తెలుసుకున్న త‌ర్వాత ఆమెను విడిచిపెట్టారు. లాహోర్‌లో ఈ ఘ‌ట‌న జ‌రిగింది.

లాహోర్‌: అర‌బిక్ భాష‌లో అక్ష‌రాలు ప్రింట్ చేసి ఉన్న డ్రెస్సును ఓ పాకిస్థాన్ మ‌హిళ(Pakistan Woman) ధ‌రించింది. అయితే ఆ మ‌హిళ దైవ దూష‌ణ‌కు పాల్ప‌డుతుంద‌న్న అనుమానాంతో కొంద‌రు వ్య‌క్తులు ఆమెను వేధించారు. ఈ ఘ‌ట‌న లాహోర్ రెస్టారెంట్‌లో ఆదివారం జ‌రిగింది. ఆమె వేసుకున్న దుస్తుల‌పై ఖురాన్ వ‌చ‌నాల‌ను రాశార‌ని ఆమెను దిగ్భందించారు. అయితే పోలీసులు ఆ హోట‌ల్‌కు చేరుకుని ఆమెను ర‌క్షించారు. ఆ త‌ర్వాత ఆమె ఈ అంశంపై క్ష‌మాప‌ణ‌లు కూడా చెప్పింది.

అర‌బిక్ భాష‌లో హ‌ల్వా అనే ప‌దం ఆమె డ్రెస్సుపై రాసి ఉన్న‌ది. ఖురాన్‌ను కించ‌ప‌రుస్తూ డ్రెస్సుపై అక్ష‌రాలు రాసి ఉంటుంద‌న్న అనుమానంతో సుమారు 300 మంది ఆమెను చుట్టుముట్టారు. ఈ ఘ‌ట‌న‌కు చెందిన వీడియోలు ఆన్‌లైన్‌లో వైర‌ల్ అయ్యింది. రెస్టారెంట్‌లో ఆ మ‌హిళ వ‌ణుకుతూ కూర్చుండిపోయింది.

ఇంత‌కీ ఆమె డ్రెస్సుపై రాసి ఉన్న అక్ష‌రాలు ఏంటో ఎవ‌రికీ తెలియ‌ద‌ని, దీంతో ఆ మ‌హిళ‌ను పోలీసు స్టేష‌న్‌కు తీసుకువెళ్లిన‌ట్లు అధికారులు చెప్పారు. అయితే మ‌త‌గురువులు వ‌చ్చి ఆ డ్రెస్సుపై ఉన్న అక్ష‌రాల‌ను డీకోడ్ చేశారు. ఆ డ్రెస్సుపై ఉన్న‌ది అర‌బిక్ కాలీగ్ర‌ఫీ అని, అవి ఖురాన్ సూక్తులు కావ‌న్నారు.