అమెరికాలో హెల్త్‌ ఎమర్జెన్సీ

వాషింగ్టన్‌, ఆగస్టు 5: మంకీపాక్స్‌ వైరస్‌ అమెరికాలో విజృంభిస్తున్నది. దీంతో వైరస్‌ను కట్టడి చేసేందుకు బైడెన్‌ ప్రభుత్వం హెల్త్‌ ఎమర్జెన్సీ ప్రకటించింది. అమెరికాలో దాదాపు 7,100 మందికి ఇప్పటికే మంకీపాక్స్‌ సోకినట్టు నిర్ధారించారు. ఎమర్జెన్సీ ప్రకటనతో మంకీపాక్స్‌ను సమర్థంగా ఎదుర్కొంటామని అమెరికా హెల్త్‌ అండ్‌ హ్యూమన్‌ సర్వీసెస్‌ హెడ్‌ జేవియర్‌ బెకెర్రా చెప్పారు. కాగా, అమెరికాలో మంకీపాక్స్‌ వ్యాక్సిన్‌ అందుబాటులో ఉంచడంలో బైడెన్‌ ప్రభుత్వం విఫలమైందని తీవ్ర విమర్శలు వచ్చాయి.

ప్రధాన నగరాలైన న్యూయార్క్‌, శాన్‌ఫ్రాన్సిస్కోలకు సరైన మోతాదులో వ్యాక్సిన్లు అందలేదని పలు దవాఖానలు చెబుతున్నాయి. ప్రస్తుతం మంకీపాక్స్‌ 70కిపైగా దేశాలకు విస్తరించింది. ప్రపంచ ఆరోగ్య సంస్థ ఇప్పటికే మంకీపాక్స్‌ను హెల్త్‌ ఎమర్జెన్సీగా ప్రకటించింది. భారత్‌లో ఇప్పటివరకు 9 మంకీపాక్స్‌ కేసులు నమోదయ్యాయి.