ఏడంతస్తుల పైనుంచి పడిన వృద్ధుడు.. అతనితోపాటు మరొకరు మృతి

Elderly Man | స్వీడన్‌లోని ఉప్సలాలో విషాదం చోటుచేసుకుంది. ఏడంతస్తుల బిల్డింగ్‌ పైనుంచి ఓ వృద్ధుడు (Elderly Man) కిందపడిపోయాడు.

స్టాక్‌హోమ్‌: స్వీడన్‌లోని ఉప్సలాలో విషాదం చోటుచేసుకుంది. ఏడంతస్తుల బిల్డింగ్‌ పైనుంచి ఓ వృద్ధుడు (Elderly Man) కిందపడిపోయాడు. దీంతో అతనితోపాటు మరో వృద్ధుడు కూడా మరణించాడు. స్వీడన్‌లోని ఉప్సలాలో ఉన్న కన్సర్ట్‌ అండ్‌ కాంగ్రెస్‌ హాల్‌లో ఏబీబీఏ లెజెండ్స్‌ జోర్న్ ఉల్వాయస్, బెన్నీ ఆండర్సన్‌కు.. వారి అభిమానులు నివాళులర్పిస్తున్నారు. వేల సంఖ్యలో అభిమానులు ఈ కార్యక్రమంలో పాల్గొన్నారు. హాల్‌ మొత్తం సంగీతంతో హోరెత్తి పోతున్నది. ఇంతలో అనుకోని సంఘటన జరిగింది.

ఆ బిల్డింగ్‌లోని ఏడో అంతస్తు నుంచి 80 ఏండ్ల వృద్ధుడు కిందపడిపోయాడు. ఈక్రమంలో అతడు కార్యక్రమంలో పాల్గొన్న మరో ఇద్దరిపై పడ్డాడు. దీంతో వారిలో ఒకరు మరణించగా, మరో మహిళ తీవ్రంగా గాయపడిందని పోలీసులు తెలిపారు. వారు కూడా 60 ఏండ్ల వయస్సు పైబడినవారేనని చెప్పారు. కాగా, ఆ వృద్ధుడు ప్రమాద వశాత్తు కిందపడ్డాడా లేదా ఎవరైనా పడేశారా, ఆత్మహత్యకు పాల్పడ్డాడా అనే విషయం తెలుసుకుంటున్నామని పోలీసులు వెల్లడించారు.