కార్ల తయారీ ప్లాంట్‌ పెట్టండి.. హ్యుందాయ్‌కి సీఎం రేవంత్‌ రెడ్డి పిలుపు

హైదరాబాద్‌లో కార్ల తయారీ ప్లాంట్‌ను ఏర్పాటు చేయాలని హ్యుందాయ్‌ యాజమాన్యానికి సీఎం రేవంత్‌ రెడ్డి పిలుపునిచ్చారు. శుక్రవారం బోధి పెవిలియన్‌లో హ్యుందాయ్‌ మోటార్‌ ఇండియా ఇంజినీరింగ్‌ (హెచ్‌ఎంఐఈ) ఎండీ చాంగ్యాన్‌ చో నేతృత్వంలోని ప్రతినిధి బృందంతో ఏర్పాటు చేసిన సమావేశంలో ముఖ్యమంత్రి మాట్లాడుతూ..

హైదరాబాద్‌, అక్టోబర్‌ 16 (నమస్తే తెలంగాణ) : హైదరాబాద్‌లో కార్ల తయారీ ప్లాంట్‌ను ఏర్పాటు చేయాలని హ్యుందాయ్‌ యాజమాన్యానికి సీఎం రేవంత్‌ రెడ్డి పిలుపునిచ్చారు. శుక్రవారం బోధి పెవిలియన్‌లో హ్యుందాయ్‌ మోటార్‌ ఇండియా ఇంజినీరింగ్‌ (హెచ్‌ఎంఐఈ) ఎండీ చాంగ్యాన్‌ చో నేతృత్వంలోని ప్రతినిధి బృందంతో ఏర్పాటు చేసిన సమావేశంలో ముఖ్యమంత్రి మాట్లాడుతూ.. రాష్ట్రంలో తయారీ రంగాన్ని ప్రోత్సహించేందుకు అన్ని రకాల సహాయ, సహకారాలు అందిస్తామని హామీ ఇచ్చారు.

కాగా, సంగారెడ్డి జిల్లా జహీరాబాద్‌ నిమ్జ్‌లో రూ.8,528 కోట్ల పెట్టుబడితో హ్యుందాయ్‌ ఇంటిగ్రేటెడ్‌ గ్లోబల్‌ ఆర్‌అండ్‌డీ కేంద్రాన్ని ఏర్పాటు చేయనున్నారు. మొత్తం 678 ఎకరాల్లో విడతలవారీగా అభివృద్ధి చేయనున్న ఈ ప్రాజెక్టుతో 4,276 మందికి ఉద్యోగావకాశాలు లభిస్తాయని చెప్తున్నారు. ఈ క్రమంలోనే ప్రాజెక్టు పురోగతిని హ్యుందాయ్‌ ప్రతినిధులు ముఖ్యమంత్రికి వివరించారు. త్వరలో మొదలయ్యే పనులకు రాష్ట్ర ప్రభుత్వం తరఫున సహకరించాలని కోరారు. దీనిపై స్పందించిన సీఎం.. అవసరమైన అనుమతులివ్వాలని అధికారులను ఆదేశించారు.