Halim | సిటీబ్యూరో, మార్చి 10 (నమస్తే తెలంగాణ): రంజాన్ మాసం రాగానే ముస్లింల ఉపవాస దీక్షలతో పాటు వెంటనే గుర్తుకొచ్చేది హలీం. దీంతో నగరంలో హలీం సందడి షురూ అయ్యింది. ప్రతి గల్లీలో హలీం సెంటర్లు వెలుస్తున్నాయి. రంజాన్ మాసం కావడంతో నగరవాసులు హలీం తినడానికి ఆసక్తి చూపిస్తారు. ముస్లింలకు ఇఫ్తార్ విందులో ప్రముఖ వంటకమైన ఈ హలీం.. మతాలకతీతంగా ప్రతి ఒక్కరికీ ఇష్టమైన స్నాక్గా మారిపోయింది. రుచితో పాటు పౌష్ఠికత కలిగిన హలీంను ప్రజలు లొట్టలేసుకుంటూ ఆరగిస్తుంటారు. ఈ వంటకాన్ని అరేబియన్స్ పరిచయం చేశారు. దీనిని హరీస్ అని కూడా పిలుస్తారు. పదో శతాబ్ధంలో కితాబ్ అల్ తబిక్ (వంటల పుస్తకం)లో తొలిసారిగా ఈ విషయాన్ని రాశారు.
హైదరాబాద్ నిజాం ఆర్మా దగ్గర ఉండే అరేబియన్ సైన్యం హలీంను మన దేశంలోకి తీసుకొచ్చింది. హలీంను చికెన్, మటన్తో తయారు చేస్తారు. తయారీదారులు మండీలు ఏర్పాటు చేసి హలీం తయారు చేయడంపై దృష్టి సారించారు. సుమారు 6 నుంచి 8 గంటల వరకు హలీం తయారీకి సమయం పడుతుంది. కేలరీలు అధికంగా ఉండే హలీం ఆరోగ్యానికి మేలు చేయడమే కాకుండా తక్షణ శక్తినిస్తుందని నిపుణులు చెబుతున్నారు. ప్రతీ వంద గ్రాము హలీంలో 157 కాల్యరీలు, 9.7 గ్రాముల ప్రొటీన్, 6.86గ్రాముల కొవ్వు పదార్థం, 15.2 గ్రాముల పిండి పదార్థాలు ఉంటాయని తెలిపారు. హలీం ధరలు ఆయా ప్రాంతాలను బట్టి ఉంటాయి. కాగా, హలీం రుచి కోసం ఇతర రాష్ర్టాల వారు సైతం హైదరాబాద్కు తరలివస్తుండటం విశేషం.