కాంగ్రెస్‌ నేతల అండదండలతో భూ దందా!

కోట్లాది రూపాయల విలువైన ప్రభుత్వ భూమిని కాజేసేందుకు కబ్జాదారులు తెగబడ్డారు. అధికార పార్టీకి చెందిన ఓ నేత అండదండలతో ఏకంగా రాజీవ్‌ గృహ కల్పకు చెందిన ప్రభుత్వ స్థలంలో అక్రమంగా బోరు తవ్వకాలు చేపట్టడం పేట్‌ బషీరాబాద్‌లో తీవ్ర కలకలం రేపింది.

• పేట్‌ బషీరాబాద్‌లో రెండువేల గజాల ప్రభుత్వ భూమి కబ్జా

• గుట్టుచప్పుడు కాకుండా బోరు తవ్వకాలు

• అడ్డుకున్న కుత్బుల్లాపూర్‌ రెవెన్యూ అధికారులు

కుత్బుల్లాపూర్‌,నవంబర్‌12: కోట్లాది రూపాయల విలువైన ప్రభుత్వ భూమిని కాజేసేందుకు కబ్జాదారులు తెగబడ్డారు. అధికార పార్టీకి చెందిన ఓ నేత అండదండలతో ఏకంగా రాజీవ్‌ గృహ కల్పకు చెందిన ప్రభుత్వ స్థలంలో అక్రమంగా బోరు తవ్వకాలు చేపట్టడం పేట్‌ బషీరాబాద్‌లో తీవ్ర కలకలం రేపింది. స్థానికుల అప్రమత్తతో రంగంలోకి దిగిన కుత్బుల్లాపూర్‌ రెవెన్యూ అధికారులు వివాదస్పదంగా ఉన్న స్థలంలో బోరు తవ్వకాల పనులను నిలిపివేశారు. పేట్‌ బషీరాబాద్‌లోని సర్వే నంబర్‌ 25/1కు ఆనుకొని ఉన్న సుమారు రెండు వేల గజాల స్థలాన్ని పక్కనే ఉన్న ఓ హుడాలేఅవుట్‌కు చెందిందని తప్పుడు పత్రాలను సృష్టించినట్లు సమాచారం.

గతంలో కాంగ్రెస్‌ పార్టీ అధికారంలో ఉన్న సమయం నుంచి ఆ స్థలం వివాదస్పదంగా మారడంతో ప్రభుత్వం ఎటు తేల్చలేకపోయింది. ఇదే అదునుగా భావించిన కొంతమంది వ్యక్తులు నకిలీ పత్రాలను సృష్టించి విక్రయించినట్లు సమాచారం. ఇదే స్థలంలో గతంలో ఎలాంటి అనుమతులు లేకుండా అక్రమంగా ఓ క్లబ్‌హౌస్‌ నిర్మాణాన్ని పూర్తి చేసుకోగా.. ప్రస్తుతం మిగిలి ఉన్న ఖాళీ స్థలాన్ని కూడా కబ్జా చేసి అమ్ముకున్నట్లు స్థానికంగా ప్రచారం జరుగుతుంది.

రెండు రోజులుగా బోరు పనులు..

స్థలాన్ని కొనుగోలు చేశామని చెబుతున్న సదరు వ్యక్తి రెండు రోజులుగా అక్కడ గుట్టుచప్పుడు కాకుండా బోరు వేసే పనులను చేపట్టడంతో అధికారులు, సిబ్బంది బోరు పనులను నిలిపివేశారు. రెవెన్యూ అధికారుల చర్యలను అడ్డుకునేందుకు స్థానికంగా ఉండే అధికార పార్టీకి చెందిన నాయకుడు ప్రయత్నించాడు. అధికారుల విధులకు ఆటంకం కలిగిస్తూ తీవ్ర స్థాయిలో వాగ్వాదానికి దిగినట్లు స్థానికులు చెబుతున్నారు. అధికారులు బోరు బండి పనులను తక్షణమే నిలిపివేయించారు.

భూమికి సంబంధించిన అసలు పత్రాలు, బోరు తవ్వకాలకు ఉన్న అనుమతులు చూపించేంత వరకు ఎలాంటి పనులు చేపట్టరాదని సదరు వ్యక్తులకు సూచించినట్లు ఆర్‌ఐ విజయ్‌కుమార్‌ తెలిపారు. కోట్ల విలువ చేసే ప్రభుత్వ స్థలాన్ని అధికార పార్టీ నేతల అండతో అమ్ముకోవడంపై స్థానిక ప్రజలు, ప్రజా సంఘాల నాయకులు ఆగ్రహం వ్యక్తం చేస్తున్నారు. అధికారులనే బెదిరించే స్థాయికి కబ్జాదారులు చేరడంపై విమర్శలు వెల్లువెత్తుతున్నాయి. కలెక్టర్‌ తక్షణమే స్పందించి ఈ స్థలంపై సమగ్ర సర్వే నిర్వహించి, కబ్జాదారులపై క్రిమినల్‌ కేసులు నమోదు చేయాలని స్థానికులు డిమాండ్‌ చేస్తున్నారు.