అరచేతిలో మేడారం సమాచారం

ఆదివాసీ గిరిజనులు తమ సంప్రదాయాల ప్రకారం నిర్వహించుకునే మేడారం సమ్మక-సారలమ్మ జాతరకు సంబంధించిన పూర్తి సమాచారం భక్తుల అరచేతిలో కనిపించనున్నది.

• మొబైల్‌ యాప్‌ ఆవిషరణ
• ప్లే స్టోర్‌ నుంచి డౌన్‌లోడ్‌ చేసుకునే వెసులుబాటు
• భక్తులకు ఉపయోగకరంగా పూర్తి సమాచారం

ములుగు, ఫిబ్రవరి 3(నమస్తే తెలంగాణ): ఆదివాసీ గిరిజనులు తమ సంప్రదాయాల ప్రకారం నిర్వహించుకునే మేడారం సమ్మక-సారలమ్మ జాతరకు సంబంధించిన పూర్తి సమాచారం భక్తుల అరచేతిలో కనిపించనున్నది. ఈ నెల 16 నుంచి 19వ తేదీ వరకు జరుగనున్న మేడారం మహా జాతరకు వచ్చే భక్తుల కోసం జిల్లా కలెక్టర్‌ కృష్ణఆదిత్య నేతృత్వంలో ‘మేడారం జాతర గైడ్‌ అఫీషియల్‌’ అనే మొబైల్‌ యాప్‌ను రూపొందించారు. ఆండ్రాయిడ్‌ స్మార్ట్‌ఫోన్‌ వినియోగదారులు ప్లేస్టోర్‌ నుంచి డౌన్‌లోడ్‌ చేసుకునే వెసులుబాటు కల్పించారు. సీఎం కేసీఆర్‌ చిత్రపటంతో కూడిన యాప్‌ ప్రదర్శితమవుతుంది.

యాప్‌లో సమగ్ర సమాచారం
యాప్‌లో మేడారం జాతరకు సంబంధించిన పూర్తి సమాచారం ఉంటుంది. ముఖ్యంగా కరోనా టీకా కేంద్రాలు, మరుగుదొడ్లు నిర్మించిన ప్రాంతాలు, జంపన్నవాగు వద్ద స్నానఘట్టాలు, తాగునీటి కేంద్రాలు, మెడికల్‌ క్యాంపులు, వాహనాల పారింగ్‌ స్థలాలు, రోజువారీగా నిర్వహించే ముఖ్య పూజా కార్యక్రమాలు, ఆర్టీసీ బస్‌ స్టాండ్‌, తప్పిపోయిన వారి ఆచూకీ కనుగొనేందుకు ఏర్పాటు చేసిన మిస్సింగ్‌ కేంద్రాలతో పాటు రోడ్డు మార్గాలు, విడిది ప్రాంతాలు, జాతర మార్గాలు, తదితర వివరాలు ఉంటాయి. అంతేకాకుండా జాతరకు సంబంధించిన ఫొటోలు, వీడియోలను తమ తమ సెల్‌ ఫోన్ల ద్వారా అప్‌లోడ్‌ చేసే వెసులుబాటును కూడా ఈ యాప్‌లో కల్పించారు.