హిందీ బిగ్బాస్ సీజన్ 13 అంటేనే అందరికీ గుర్తొచ్చే పేరు షెహనాజ్ గిల్. మోడల్, సింగర్, నటి అయిన హెహనాజ్ ఈ షోలో సందడి చేసింది. అయితే, ఈ షోలో ఆమె చాలా లావుగా ఉండేది. బిగ్బాస్ షో తర్వాత కొద్దిరోజులకే నాజూగ్గా మారిపోయింది. అందరినీ ఆశ్చర్యపరిచింది. శిల్పాశెట్టి నిర్వహించే ‘షేప్ ఆఫ్ యూ’లో వెయిట్లాస్ సీక్రెట్స్ను వివరించింది.
బరువు తగ్గేందుకు ఇంటినుంచి బయటకు వెళ్లాల్సిన అవసరం లేదని, పర్సనల్ ట్రైనర్ కూడా అవసరం లేదని షెహనాజ్ గిల్ పేర్కొంది. ఆహారంలో స్వల్ప మార్పులు చేసుకుంటే చాలు మంచి ఫిట్నెస్ సొంతం చేసుకోవచ్చని తెలిపింది. ఫిట్నెస్ సాధించాలంటే ముందు అందుకోసం మనసును సంసిద్ధం చేసుకోవాలని పేర్కొంది. శారీరక దృఢత్వం సాధించాలంటే ముందు మానసిక దృఢత్వం సాధించాలని సూచించింది.
షెహనాజ్ వెయిట్ లాస్ ప్లాన్లో 70శాతం డైట్ ప్లానే. అందరి దినచర్య టీ లేదా పసుపు పాలు, తేనె నీటితో ప్రారంభమైతే ఆమె మాత్రం ప్రతిరోజూ ఉదయం ఆపిల్ సైడర్ వెనిగర్ తాగేది. అల్పాహారంలో ప్రొటీన్స్ ఎక్కువగా ఉండేలా చూసుకునేది. మెంతి పరోటా, మొలకెత్తిన విత్తనాలు, దోస ఇలా ఏదో ఒకటి పెద్దమొత్తంలో తినేది. ఇదే షెహనాజ్ వెయిట్లాస్ జర్నీలో కీలకం.
హెహనాజ్ వెయిట్లాస్ డైట్ప్లాన్లో నీటిది ప్రధాన పాత్ర..కేవలం 30శాతం మాత్రమే ఆహారం తీసుకొని, మిగతా 70 శాతం కడుపును నీటితో నింపేసేది. అయితే, అంత మొత్తంలో నీటిని తాగడం కొందరికి ఇష్టముండదని, అలాంటివారు పండ్లు కలిపిన నీటిని తాగొచ్చని షెహనాజ్ సూచించింది. అలాగే, ఈ జర్నీలో ఎన్నో అడ్డంకులు వస్తాయని తెలిపింది. ఎన్ని అడ్డంకులు వచ్చినా ఆత్మవిశ్వాసంతో ముందుకుసాగాలని పేర్కొంది. బరువు తగ్గాలనే బలమైన సంకల్పం ఉండాలని, అప్పుడే కోరికలను జయిస్తారని తెలిపింది.