కొవ్వు మాత్రమే కరగాలంటే

ప్రస్తుత రోజుల్లో ఊబకాయులు పెరుగుతున్నారు. లేనిపోని ఆరోగ్య సమస్యలను కొని తెచ్చుకుంటున్నారు. ఈ క్రమంలో బరువు తగ్గడం కోసం.. డైటింగ్‌, వ్యాయామాన్ని ఆశ్రయిస్తున్నారు. అయితే, ఈ ప్రక్రియలో భాగంగా చాలామంది కొవ్వుతోపాటు కండరాల క్షీణతబారిన పడుతున్నారని నిపుణులు చెబుతున్నారు.

ప్రస్తుత రోజుల్లో ఊబకాయులు పెరుగుతున్నారు. లేనిపోని ఆరోగ్య సమస్యలను కొని తెచ్చుకుంటున్నారు. ఈ క్రమంలో బరువు తగ్గడం కోసం.. డైటింగ్‌, వ్యాయామాన్ని ఆశ్రయిస్తున్నారు. అయితే, ఈ ప్రక్రియలో భాగంగా చాలామంది కొవ్వుతోపాటు కండరాల క్షీణతబారిన పడుతున్నారని నిపుణులు చెబుతున్నారు. దీనిని నివారించి, కేవలం కొవ్వును మాత్రమే కరిగించుకోవడానికి కొన్ని పద్ధతులు పాటించాలని సూచిస్తున్నారు.

• కండరాలు క్షీణించకుండా ఉండాలంటే.. తగినంత ప్రొటీన్‌ తీసుకోవాలి. ఇది కండరాల మరమ్మతుకు, పెరుగుదలకు సహాయపడుతుంది. శరీర బరువులో ప్రతి కేజీకి కనీసం 1.2 గ్రా. నుంచి 1.6 గ్రా. ప్రొటీన్‌ తీసుకోవాలి. ఇందుకోసం గుడ్లు, పప్పు ధాన్యాలు, పనీర్‌, సోయా, చికెన్‌ బ్రెస్ట్‌, చేపలు ఆహారంలో భాగం చేసుకోవాలి.
• వ్యాయామంలో కేవలం కార్డియో (నడక, పరుగు) మాత్రమే చేస్తే.. కండరాలు కరిగే అవకాశం ఉంది. అలాకాకుండా ఉండాలంటే.. వారానికి 3-4 రోజులైనా, బరువులు ఎత్తడం, బాడీ వెయిట్‌ లాంటి వ్యాయామాలు చేయాలి. దీనివల్ల మెదడుకు ‘కండరాలు అవసరం’ అనే సంకేతం అందుతుంది.
• త్వరగా బరువు తగ్గాలనే ఆరాటంతో కొందరు ఆహారం చాలా తక్కువగా తీసుకుంటారు. దీనివల్ల శరీరం శక్తి కోసం కండరాలను కరిగించడం మొదలుపెడుతుంది. కాబట్టి, రోజువారీ అవసరం కంటే కేవలం 300-500 కేలరీలు తక్కువగా తీసుకుంటే సరిపోతుంది.
• నిద్రలోనే కండరాల నిర్మాణం వేగంగా సాగుతుంది. కాబట్టి, రోజుకు 7-8 గంటల గాఢ నిద్ర పోవాలి. అప్పుడే
  కండరాల క్షీణత తగ్గుతుంది.
• ఇక ఒకేసారి అధిక బరువు తగ్గడం కూడా ఆరోగ్యానికి ఏమాత్రం మంచిదికాదు. వారానికి 0.5 నుంచి 1 కేజీ బరువు తగ్గడం ఆరోగ్యకరం. అంతకంటే వేగంగా తగ్గితే కండరాల నష్టానికి దారితీస్తుంది.