Pregnancy Tips | నా వయసు పాతికేండ్లు. గర్భిణిని. ప్రస్తుతం ఆరో నెల. ఇటీవల ముక్కు నుంచి రెండుమూడు సార్లు రక్తస్రావం అయ్యింది. డాక్టర్ దగ్గరికి వెళితే మందులిచ్చారు. అసలు, ఇలా ఎందుకు జరుగుతుంది. ఇదేమైనా ప్రమాద సంకేతమా?
– ఓ పాఠకురాలు
గర్భిణుల్లో కొందరికి ఇలాంటి పరిస్థితి ఎదురవుతుంది. శరీరంలో ఈస్ట్రోజెన్ హార్మోన్ స్థాయిలో వచ్చే మార్పుల కారణంగా ఇలా జరుగుతుంది. అంటే ముక్కులోపలి భాగం ఈ హార్మోన్కు తీవ్రంగా స్పందించడంతో ముక్కులోంచి రక్తం కారుతుంది. మీ విషయంలో కూడా ఇలానే జరిగి ఉంటే అదేమీ ప్రమాదకరం కాదు. డాక్టర్ ఇచ్చిన మందులు వాడితే సరిపోతుంది.
ఈఎన్టీ డాక్టర్ను కూడా ఒకసారి కలవండి. ముక్కుకు సంబంధించి ఇతర సమస్యలేమైనా ఉన్నాయా అన్నదీ తెలుసుకుంటే మంచిది. అలాగే ఎండలో ఎక్కువగా తిరిగినా కొన్నిసార్లు ముక్కు నుంచి రక్తస్రావం అవుతుంది. బాగా జలుబు చేసినప్పుడు.. గట్టిగా చీదితే నాసికం లోపలి సున్నితమైన నరాలు చిట్లినట్టు అయిపోయినా ఇలా జరగవచ్చు. ఇవన్నీ ఒకసారి సరిచూసుకుని, మీ విషయంలో కారణమేంటో తెలుసుకుని, మందులు వాడితే సరిపోతుంది. భయపడాల్సిన అవసరం లేదు.
– డాక్టర్ పి. బాలాంబ సీనియర్ గైనకాలజిస్ట్