Visit:
Smoking | ధూమపానం ఆరోగ్యానికి హానికరమని తెలిసినా, చాలా మంది రోజుకు ఒక్క సిగరెట్ మాత్రమే, అప్పుడప్పుడూ మాత్రమే తాగుతాను అనే కారణాలతో అలవాటును కొనసాగిస్తుంటారు. అయితే పొగాకు వినియోగానికి సురక్షితమైన పరిమితి అంటూ ఏదీ లేదని ఆరోగ్య నిపుణులు చెబుతున్నారు. ధూమపానం ఊపిరితిత్తులకే కాకుండా గుండె, రక్తనాళాలు, మెదడు, చర్మం సహా శరీరంలోని దాదాపు ప్రతి అవయవంపై ప్రభావం చూపుతుంది. అయితే ధూమపానం పూర్తిగా మానేసిన వెంటనే శరీరం తనను తాను పునరుద్ధరించుకునే ప్రక్రియను ప్రారంభిస్తుంది. చివరి సిగరెట్ ఆర్పిన కొద్ది నిమిషాల నుంచే ఆరోగ్యపరమైన మార్పులు కనిపించడం మొదలవుతాయి. ధూమపానం మానేసిన కేవలం 20 నిమిషాల తర్వాత గుండె స్పందన రేటు, రక్తపోటు క్రమంగా సాధారణ స్థాయిలకు చేరడం ప్రారంభమవుతుంది. ఇది గుండెపై పడే ఒత్తిడిని తగ్గించడంలో కీలక పాత్ర పోషిస్తుంది.
12 గంటల లోపే రక్తంలో పేరుకుపోయిన కార్బన్ మోనాక్సైడ్ స్థాయిలు సాధారణ స్థితికి చేరుకుంటాయి. దీంతో శరీరంలోని కణజాలాలకు ఆక్సిజన్ సరఫరా మెరుగుపడి అవయవాలు మరింత సమర్థంగా పనిచేయడం ప్రారంభిస్తాయి. కొన్ని వారాలు, నెలలు గడిచేకొద్దీ రక్తప్రసరణ మెరుగుపడుతుంది. ఊపిరితిత్తులు కూడా క్రమంగా కోలుకోవడం మొదలవుతుంది. గతంలో నడవడం, మెట్లు ఎక్కడం లేదా చిన్నపాటి వ్యాయామం చేయడం కూడా కష్టంగా అనిపించినవారికి ఈ పనులు సులభంగా మారుతాయి. ధూమపానం మానేసిన తర్వాత దగ్గు, శ్వాస తీసుకోవడంలో ఇబ్బందులు క్రమంగా తగ్గుముఖం పడతాయి. సంవత్సరాలుగా ఊపిరితిత్తుల్లో పేరుకుపోయిన హానికర పదార్థాలను శరీరం బయటకు పంపే ప్రక్రియ వేగవంతమవుతుంది. ఫలితంగా శ్వాసక్రియ మెరుగుపడుతుంది. ఒక సంవత్సరం పాటు ధూమపానానికి దూరంగా ఉంటే కరోనరీ హార్ట్ డిసీజ్ ప్రమాదం సుమారు సగానికి తగ్గుతుంది. గుండెపోటు, స్ట్రోక్ వంటి తీవ్రమైన గుండె సంబంధిత సమస్యలకు ధూమపానాన్ని ప్రధాన కారణాల్లో ఒకటిగా పరిగణిస్తున్న నేపథ్యంలో దీన్ని అత్యంత కీలకమైన మార్పుగా భావిస్తున్నారు.
ఐదేళ్ల తర్వాత స్ట్రోక్ వచ్చే ప్రమాదం ధూమపానం చేయని వ్యక్తుల స్థాయికి దగ్గరపడుతుంది. పదేళ్ల తర్వాత ఊపిరితిత్తుల క్యాన్సర్ వల్ల మరణించే ప్రమాదం ధూమపానం కొనసాగిస్తున్న వ్యక్తులతో పోలిస్తే దాదాపు సగానికి తగ్గుతుంది. ఇతర రకాల క్యాన్సర్ల ప్రమాదాలు కూడా గణనీయంగా తగ్గడం ప్రారంభమవుతుంది. పదిహేనేళ్ల పాటు ధూమపానం చేయకుండా ఉంటే గుండె జబ్బుల ప్రమాదం ధూమపానం ఎప్పుడూ చేయని వ్యక్తుల స్థాయికి చేరువ అవుతుంది. ఈ సమయంలో శరీరం అనేక విధాలుగా కోలుకుని దీర్ఘకాలిక ఆరోగ్య ప్రయోజనాలను అందిస్తుంది. ధూమపానం మానేయడం వల్ల అంతర్గత ఆరోగ్యమే కాకుండా బాహ్య రూపంలో కూడా మార్పులు కనిపిస్తాయి. శ్వాస సులభంగా మారడం, రుచి, వాసనలను బాగా గుర్తించగలగడం, శక్తి స్థాయిలు పెరగడం, చర్మం ఆరోగ్యంగా కనిపించడం వంటి ప్రయోజనాలు క్రమంగా వెల్లడవుతాయి. ధూమపానం వల్ల కలిగిన నష్టం ఎంత ఎక్కువగా ఉన్నప్పటికీ శరీరానికి తనను తాను మరమ్మతు చేసుకునే అద్భుత సామర్థ్యం ఉంటుంది. అందుకే ధూమపానం మానేందుకు తీసుకునే నిర్ణయం ఎంత త్వరగా ఉంటే, ఆరోగ్య ప్రయోజనాలు అంత త్వరగా ప్రారంభమవుతాయని నిపుణులు చెబుతున్నారు.
