నమస్తే మేడం. నా వయసు ఇరవై రెండు. ఎంబీఏ రెండో సంవత్సరం చదువుతున్నా. నాకు పీరియడ్స్ సమయంలో బ్లీడింగ్ ఎక్కువగా అవుతుంది. దీనివల్ల తరచూ ప్యాడ్స్ మార్చుకోవాల్సి వస్తున్నది. ఇదంతా ఇబ్బందిగా అనిపిస్తున్నది. అయితే ఈ మధ్య మా చుట్టాలమ్మాయి ట్యాంపూన్లు, మెన్స్ట్రువల్ కప్ల గురించి చెప్పింది. వీటివల్ల నా సమస్య తీరుతుందని అనిపించింది. కానీ, వాటిని వాడితే కన్నెపొర దెబ్బ తింటుందని అమ్మ అనుమానం. సలహా ఇవ్వగలరు.
– ఓ సోదరి
యోని లోపలికి చొచ్చుకుపోయే ట్యాంపూన్లు, మెన్స్ట్రువల్ కప్లలాంటి వాటితో కొంత జాగ్రత్తగా ఉండటం మంచిదే. మీకు పెళ్లికాలేదు కాబట్టి, కన్నెపొర దెబ్బతినకుండా ఉండాలంటే చిన్న సైజు మెన్స్ట్రువల్ కప్ను వాడండి. ఈ తరహా కప్లలో స్మాల్, మీడియం, లార్జ్… ఇలా రకరకాలు ఉంటాయి. చిన్నవి అయితే కప్పు ఎక్కువ లోపలికి వెళ్లే ప్రమాదం ఉండదు. ట్యాంపూన్ల వల్ల మాత్రం కొన్నిసార్లు కన్నెపొర దెబ్బతినే ఆస్కారం ఉంది. కాబట్టి ప్రస్తుతానికి దాన్ని పక్కన పెట్టొచ్చు. ఇంకో విషయం.. వాటిని ఎప్పటికప్పుడు మార్చుకుంటూ ఉండాలి. నెలసరి స్రావాల్ని శోషించుకునే ఈ పరికరం యోని లోపలే ఉంటుంది కనుక.. ఎక్కువ సేపు మార్చకుండా ఉంటే ‘టాక్సిక్ షాక్ సిండ్రోమ్’ బారినపడే అవకాశం ఉంది.
జ్వరం, ఫ్లూ లక్షణాలతోపాటు కొన్నిసార్లు డయేరియాలా కనిపించే ఈ వ్యాధి అత్యంత ప్రమాదకరంగా మారే ప్రమాదం ఉంది. ఇక, మెన్స్ట్రువల్ కప్ వాడినా సరే.. దాన్ని మూడు నాలుగు గంటలకు ఒకసారి ఖాళీ చేస్తూ ఉండాలి. ఈ కప్లను కూడా రెండు మూడు నెలలు వాడి పడేయాలి. దీర్ఘకాల వినియోగం మంచిది కాదు. ఇక, మీకు బ్లీడింగ్ ఎక్కువని అంటున్నారు కాబట్టి, సమస్య మూల కారణాలు తెలుసుకోవాలి. థైరాయిడ్ ఉన్నా ఈ ఇబ్బంది వస్తుంది. వెంటనే మంచి గైనకాలజిస్టును సంప్రదించి, తగిన పరీక్షలు చేయించుకుంటే మీ సమస్యకు పరిష్కారం లభిస్తుంది.
డాక్టర్ పి. బాలాంబ సీనియర్ గైనకాలజిస్ట్