Banana Milk Shake Vs Banana | బ‌నానా షేక్ లేదా అర‌టి పండ్లు.. రెండింటిలో ఏవి ఎక్కువ మేలు చేస్తాయి..?

మ‌న ఆరోగ్యానికి అర‌టిపండ్లు ఎంతో మేలు చేస్తాయ‌న్న సంగ‌తి మ‌న‌కు తెలిసిందే. అర‌టిపండ్ల‌ల్లో ఫైబ‌ర్ తో పాటు మ‌న శ‌రీరానికి అవ‌స‌ర‌మ‌య్యే ఎన్నో పోష‌కాలు ఉంటాయి. వీటిని తీసుకోవ‌డం వ‌ల్ల మ‌న జీర్ణ‌వ్య‌వ‌స్థ‌కు ఎంతో మేలు క‌లుగుతుంది.

Banana Milk Shake Vs Banana | మ‌న ఆరోగ్యానికి అర‌టిపండ్లు ఎంతో మేలు చేస్తాయ‌న్న సంగ‌తి మ‌న‌కు తెలిసిందే. అర‌టిపండ్ల‌ల్లో ఫైబ‌ర్ తో పాటు మ‌న శ‌రీరానికి అవ‌స‌ర‌మ‌య్యే ఎన్నో పోష‌కాలు ఉంటాయి. వీటిని తీసుకోవ‌డం వ‌ల్ల మ‌న జీర్ణ‌వ్య‌వ‌స్థ‌కు ఎంతో మేలు క‌లుగుతుంది. పేగు ఆరోగ్యానికి ఇవి ఎంతో మేలు చేస్తాయి. అలాగే ఇవి సుల‌భంగా జీర్ణ‌మ‌వుతాయి క‌నుక వీటిని తీసుకోవ‌డం వ‌ల్ల త‌క్ష‌ణ శ‌క్తి ల‌భిస్తుంది. అల్పాహారంగా, చిరుతిండిగా లేదా జిమ్ చేసిన త‌రువాత వీటిని తీసుకోవ‌డం వ‌ల్ల మంచి ఫ‌లితం ఉంటుంది. అలాగే కొంత మంది అర‌టిపండును నేరుగా తిన‌డానికి ఇష్ట‌ప‌డ‌రు. అర‌టిపండ్ల‌తో బ‌నానా షేక్ వంటి వాటిని త‌యారు చేసి తీసుకుంటూ ఉంటారు. అయితే అర‌టిపండ్ల‌ను నేరుగా తిన‌డం మంచిదా.. స్నాక్స్ రూపంలో తీసుకోవ‌డం మంచిదా.. అన్న సందేహాలు కూడా మ‌న‌లో చాలా మందికి వ‌స్తూ ఉంటాయి.

మిల్క్ షేక్ వ‌ద్దు..

అర‌టిపండును ఏ విధంగా తీసుకోవ‌డం మ‌న ఆరోగ్యానికి, జీర్ణ‌వ్య‌వ‌స్థ‌కు మంచిదో.. నిపుణులు దీని గురించి ఏమంటున్నారో ఇప్పుడు తెలుసుకుందాం. నిపుణుల అభిప్రాయం ప్ర‌కారం, అర‌టిపండును ఏ రూపంలో తీసుకోవాలో వ్య‌క్తి శారీర‌క శ్ర‌మ‌పై ఆధార‌ప‌డి ఉంటుంది. పేగు ఆరోగ్యాన్ని మెరుగుప‌రుచుకోవాల‌నుకునే వారు అర‌టిపండును నేరుగా తీసుకోవ‌డం మంచిది. జిమ్ కి వెళ్లే వారు, భారీ వ్యాయామాలు చేసే వారికి క్యాల‌రీలు ఎక్కువ‌గా అవ‌స‌ర‌మ‌వుతాయి. క‌నుక వ్యాయామాలు చేసేవారు అర‌టిపండును మిల్క్ షేక్ రూపంలో తీసుకోవ‌డం మంచిద‌ని నిపుణులు అభిప్రాయ‌ప‌డుతున్నారు. ఇక ఆయుర్వేదం ప్ర‌కారం అర‌టిపండును న‌మ‌లి తిన‌డం మంచిద‌ని వారు చెబుతున్నారు. అర‌టిపండును న‌మ‌ల‌డం వ‌ల్ల లాలాజ‌లంలో ఉండే స‌మ్మేళ‌నాలు స‌క్రియం చేయ‌బ‌డ‌తాయి. దీంతో జీర్ణ‌క్రియ సుల‌భ‌త‌రం అవుతుంది.

జీర్ణ క్రియ‌కు ఆటంకం..

అర‌టిపండును న‌మ‌ల‌డం వ‌ల్ల దానిలో ఉండే మొత్తం పోష‌కాలు శ‌రీరానికి చ‌క్క‌గా అందుతాయి. అర‌టిపండుతో స్మూతీ, షేక్ వంటివి చేసి తీసుకోవ‌డం వ‌ల్ల దానిని న‌మ‌లాల్సిన అవ‌స‌రం లేదు. ఇది జీర్ణవ్య‌వ‌స్థ‌పై అద‌న‌పు భారాన్ని క‌లిగిస్తుంద‌ని ఆయుర్వేద నిపుణులు చెబుతున్నారు. అంతేకాకుండా ఆయుర్వేదం ప్ర‌కారం రెండు రెండు వేరువేరు ప‌దార్థాల‌ను క‌లిపి తీసుకోవ‌డం వ‌ల్ల శ‌రీర స‌హ‌జ స‌మ‌తుల్యం దెబ్బ‌తింటుంది. అర‌టిపండును పాల‌తో క‌లిపి మిక్స్ చేసి తీసుకోవ‌డం వ‌ల్ల జీర్ణ‌క్రియ నెమ్మదిస్తుంది. దీంతో క‌ఫం పెరుగుతుంది. ఇది సైన‌స్, జ‌లుబు, అల‌ర్జీ వంటి వాటికి దారి తీస్తుంది. బ‌నానా షేక్ పొట్ట‌లోకి చేరిన త‌రువాత అర‌టిపండులో ఉండే మాలిక్, సిట్రిక్ ఆమ్లాలు పాల‌తో క‌లిసి పెరుగుగా మారుతుంది. దీంతో జీర్ణ‌క్రియ నెమ్మ‌దిస్తుంది. బ‌నానా షేక్ జీర్ణం అవ్వ‌డానికి స‌మ‌యం ప‌ట్ట‌డంతో పాటు పోష‌కాల‌ను కూడా శ‌రీరం స‌రిగ్గా గ్ర‌హించ‌దు.

క‌నుక అర‌టిపండును నేరుగా తీసుకోవ‌డ‌మే మంచిద‌ని నిపుణులు అభిప్రాయ‌ప‌డుతున్నారు. క్యాల‌రీలు ఎక్కువ‌గా కావాల్సిన వారు అర‌టిపండును తిన్న రెండు గంట‌ల త‌రువాత పాలు తాగ‌డం మంచిద‌ని నిపుణులు తెలియ‌జేస్తున్నారు. ఇలా చేయ‌డం వ‌ల్ల జీర్ణ స‌మ‌స్య‌లు రాకుండా ఉండ‌డంతో పాటు శ‌రీరానికి పోష‌కాలు కూడా చ‌క్క‌గా అందుతాయి. పొట్ట సంబంధిత స‌మ‌స్య‌ల‌తో బాధ‌ప‌డే వారు బ‌నానా షేక్ ను తీసుకునే ముందు వైద్యుడిని సంప్ర‌దించ‌డం మంచిద‌ని నిపుణులు చెబుతున్నారు.