ప్రాణమున్న నేస్తం

అప్పుడే పుట్టిన శిశువు ఏడుపు ఒక సంగీత నాదం! కుటుంబ వైభవం అంటే ఆ మొదటి ఏడుపే అన్నట్టు ఈ ఆనందం అవధులు దాటి అమందానంద సందోహమై పేరు పెట్టే పండుగగా వెల్లివిరుస్తుంది బంధుకోటి సభ్యమైన దీవెనలు మందస్మితాలై ఊయలలూపుతుంటాయి

అప్పుడే పుట్టిన శిశువు ఏడుపు
ఒక సంగీత నాదం!
కుటుంబ వైభవం అంటే
ఆ మొదటి ఏడుపే అన్నట్టు
ఈ ఆనందం అవధులు దాటి
అమందానంద సందోహమై
పేరు పెట్టే పండుగగా వెల్లివిరుస్తుంది
బంధుకోటి సభ్యమైన దీవెనలు
మందస్మితాలై ఊయలలూపుతుంటాయి

పూలు రాలినట్టు ఆ చిరునవ్వులు
అమృతాభిషేకం చేస్తుంటే
అమ్మమ్మ నాన్నమ్మ తాతల దీవెనలు
కణతలకు అద్దుకునే చేతి చిటికెలవుతాయి
చిన్నారి పాదాలు
నడకల తన్మయత అయినప్పుడు
ఆ లోగిలి మొత్తం
నవ్యలోకాలలో తేలుతుంది
పసి హృదయం
ముసలి బంధాల వింత
కొన్ని జీవితాల్లో బంగరు
ముడి అవుతుంది

అవును …ఆ నిశ్శబ్దపు ఇంట
చిరుసవ్వడి తెచ్చిన అమ్మ గర్భపు గుడిని
మంగళదాయని అని అందామంటూ
ప్రాంగణమే ఆ ఇంటి వ
సంత వేదిక అవుతుంది
ఆ ఇంటి శిశిరాల
శీతలమే నవజాత శిశువు!

నడకలు నేర్చిన ముద్దు మురిపాల నుండి
నైర్మల్య భావస్పర్శల ప్రేమ పాఠశాల నుండి

చదువుల అభినందనల వరకు
తూర్పు మెరుపులు కావచ్చు
తెలివెన్నెల చల్లందనమూ కావచ్చు
సహజాతి సహజ కోపతాపాల
లయాన్విత దృశ్యాలూ ఎదురవుతుంటాయి

హృదయాలూ కలలూ కలగసి
కష్టాలవైనా నవ్వులవైనా
కన్నీళ్లు జాలువారి
హెచ్చుతగ్గుల సంగీతము అవుతుంది
అన్నిటికన్నా ఉద్యోగ
సద్యోగాల పయనాలలో
సాధ్యాసాధ్యలెదురైనప్పుడు
ఒక కర్తవ్యం ఎన్నో విశ్వాసాలు
అవినాభావ సమ్మేళనం అవుతుంది
వావి వరసల అవతారాలుగాను
కుటుంబము ఒక
నైపుణ్య నిర్మాణం అవుతుంది
ఇవేవీ సంపూర్ణ త్యాగాలు కావు
ఇవేవీ జయాపజయాల
చిట్టాపద్దులూ కావు
ఆశీస్సులుగా అవతరించిన తోడు
నిన్నటి త్యాగాలకు నాంది కూడా అవ్వచ్చు

గడుస్తున్న గహనమైన రోజులలో
మెట్లు దిగకుండా పైకి ఎదిగే ప్రయాణంలో
తామూ పదోన్నతి పొందాలని
భుజాలకు బాధ్యతలను అప్పగించే పెద్దలు ఉండాలి ఆ ఇంట్లో!

ఆశయాల శిఖరాలను తాకాలని
నువ్వు తపిస్తున్న వేళల్లో
అమ్మగానూ నాన్నగానూ
విజయ సోపానం ఎక్కిన సందర్భాలలో
సాధించిన సంపాదనల ప్రగతి పథంలో

గృహ సముదాయమూ
వృత్తి సముదాయమూ
రెండింటిలో మహానందం అయ్యేదేదంటే
వెలుగు రేఖ వంటి ఇంటి పరివారమే !

-డాక్టర్‌ కొండపల్లి నీహారిణి