suiside | ఉరేసుకొని వ్యక్తి ఆత్మహత్య

అడ్డగుట్ట : ఆర్థిక ఇబ్బందులు తాళలేక ఓ వ్యక్తి ఫ్యాన్‌కు ఉరేసుకొని ఆత్మహత్య చేసుకున్న సంఘటన తుకారాంగేట్‌ పోలీస్‌స్టేష‌న్‌ పరిధిలో చోటు చేసుకుంది. సర్కిల్‌ ఇన్‌స్పెక్టర్‌ ఎల్లప్ప, బాధితుల కథనం ప్రకారం… అడ్డగుట్ట ప్రాంతానికి చెందిన వెంకటేష్ (41) వృత్తిరీత్యా కారుడైవర్‌. ఇతనికి భార్య, ఇద్దరు పిల్లలు ఉన్నారు. భార్య పిల్లలతో కలిసి వెంకటేష్‌ దోమలగూడలో ఉంటున్నాడు. వెంకటేష్‌ తెలంగాణ ఉద్యమ సమయంలో టీఆర్‌ఎస్ పార్టీలో చురుకైన పాత్ర పోషించాడు.

ఉద్యమంలో భాగంగా పలుమార్లు జైలుకు కూడా వెళ్లాడు. కరోనా సమయంలో ఉద్యోగం పోవడంతో ఆర్థికంగా చాలా బలహీనపడ్డాడు. అడ్డగుట్టలో ఉండే వెంకటేష్‌ తల్లి వద్దకు 21న‌ సాయంత్రం వచ్చి భోజనం చేసి గదిలోకి వెళ్లి పడు కున్నాడు. ఉదయం 8 గంటల ప్రాంతంలో గదిలోకి వెళ్లిచూడగా ఫ్యాన్‌కు ఉరేసుకొని ఉన్నాడు. స్థానికుల సమాచారం మేరకు పోలీసులు సంఘటన స్థలానికి చేరుకొని మృతదేహాన్ని పోస్టుమార్టం నిమిత్తం ఆసుపత్రికి తరలించారు. కుటుంబసభ్యుల ఫిర్యాదు మేరకు పోలీసులు కేసు నమోదు చేసుకొని దర్యాఫ్తు చేస్తున్నారు.