‘బాంబ్‌’ అనడంతో ఇబ్బంది పడిన వృద్ధ దంపతులు… ఒక వ్యక్తి అరెస్ట్‌

తిరువనంతపురం: ‘బాంబ్‌’ అని అన్నందుకు ఒక వృద్ధుడితోపాటు అతడి భార్య ఇబ్బంది పడ్డారు. ఈ నేపథ్యంలో ఆ వ్యక్తిని పోలీసులు అరెస్ట్‌ చేశారు. కేరళలోని కొచ్చీ అంతర్జాతీయ విమానాశ్రయంలో ఈ సంఘటన జరిగింది. 63 ఏళ్ల వృద్ధుడు తన భార్యతో కలిసి విదేశీ ప్రయాణం కోసం శనివారం తెల్లవారుజామున 1.30 గంటలకు కొచ్చీ అంతర్జాతీయ విమానాశ్రయానికి చేరుకున్నాడు. చెక్‌ ఇన్‌ కౌంటర్‌ వద్ద లగేజీలో ఏం ఉందని ఎయిర్‌పోర్ట్‌ సిబ్బంది అడిగారు. అయితే ఆ వృద్ధుడు ‘బాంబ్‌’ అని అన్నాడు. దీంతో లగేజీ చెక్‌ ఇన్‌ సిబ్బంది వెంటనే ఎయిర్‌పోర్ట్‌ సెక్యూరిటీని అలెర్ట్‌ చేశారు.

కాగా, ఎయిర్‌పోర్ట్‌ సెక్యూరిటీ సిబ్బంది ఆ వృద్ధ జంటను అదుపులోకి తీసుకున్నారు. నెడుంబస్సేరి పోలీసులకు వారిని అప్పగించారు. దీంతో లగేజ్‌లో బాంబ్‌ ఉందన్న వృద్ధుడ్ని పోలీసులు అరెస్ట్‌ చేశారు. అనంతరం బెయిల్‌పై అతడ్ని విడుదల చేశారు. అయితే ‘బాంబ్‌’ అని ఊరికే అన్న వృద్ధుడి మాట, ఆ వృద్ధ జంటను ఇబ్బందులకు గురి చేసింది.