పెళ్లికి నిరాకరించిన మహిళ… స్నేహితులతో కలిసి ప్రియుడు లైంగిక దాడి

పాట్నా: ఒక మహిళ పెళ్లికి నిరాకరించడంతో ప్రియుడు తన స్నేహితులతో కలిసి ఆమెపై సామూహిక లైంగిక దాడికి పాల్పడ్డాడు. బీహార్‌లోని సీతామర్హి జిల్లాలో ఈ దారుణం జరిగింది. ఒక గ్రామానికి చెందిన 22 ఏళ్ల మహిళ, 27 ఏళ్ల మొహమ్మద్ కైష్‌ మధ్య పరిచయం ఏర్పడింది. దీంతో అతడు ఆమెను లొంగదీసుకున్నాడు. ఆ తర్వాత పెళ్లి చేసుకోవాలని ఆమెను బలవంతం చేశాడు. అయితే ఆ మహిళ అతడితో పెళ్లికి నిరాకరించింది. ఈ నేపథ్యంలో జూన్‌ 24న కైష్‌, ఆ మహిళను ఒక ప్రాంతానికి పిలిపించాడు. అక్కడ ఇద్దరు స్నేహితులతో కలిసి ఆమెపై సామూహిక లైంగిక దాడికి పాల్పడ్డాడు. ఆ మహిళ అపస్మారకంగా పడిఉండగా ఆ ముగ్గురు అక్కడి నుంచి పారిపోయారు.

మరునాడు తెలివిలోకి వచ్చిన తర్వాత బాధితురాలు జరిగిన విషయాన్ని తన కుటుంబ సభ్యులకు తెలిపింది. దీంతో పోలీసులకు ఫిర్యాదు చేసేందుకు వారు సిద్ధం కాగా, పంచాయితీ ద్వారా సమస్యను పరిష్కరించుకుందామని నిందితులు, గ్రామస్తులు నచ్చజెప్పారు. ఆ వ్యక్తితో పెళ్లి జరిపిస్తామని హామీ ఇచ్చారు. అయితే 20 రోజులైనా నిందితులపై గ్రామ పెద్దలు ఎలాంటి చర్యలు తీసుకోలేదు. దీంతో బాధితురాలు ఈ నెల 14న పోలీసులకు ఫిర్యాదు చేసింది. కేసు నమోదు చేసిన పోలీసులు పరారీలో ఉన్న నిందితులను అరెస్ట్‌ చేసేందుకు ప్రయత్నిస్తున్నారు.