‘కేజీఎఫ్-2’ వంటి బ్లాక్బస్టర్ హిట్ తర్వాత చిత్ర హీరో యష్ నుంచి ఇప్పటివరకు మరో సినిమా ప్రకటన రాలేదు. ఆయన తదుపరి సినిమా ఏమిటన్నదే ఆసక్తికరంగా మారింది. ఇదిలావుండగా నిర్మాత మధు మంతెన ప్రతిష్టాత్మకంగా తెరకెక్కించబోతున్న ‘రామాయణం’ చిత్రంలో యష్ రావణుడి పాత్రలో నటించనున్నారనే వార్తలు ఇటీవల ప్రచారంలోకి వచ్చాయి. నితీష్ తివారి దర్శకత్వం వహించనున్న ఈ సినిమాలో రణభీర్కపూర్ రాముడి పాత్రలో నటించబోతున్నారు. అయితే యష్ రావణుడి పాత్రలో కనిపించనున్నారనే వార్తలను ఆయన సన్నిహిత వర్గాలు ఖండించాయి. ‘
పాత్రల ఎంపికలో యష్ అభిమానుల మనోభావాలకు అత్యంత ప్రాధాన్యతనిస్తారు. నెగెటివ్ పాత్రల్లో అస్సలు నటించరు. రావణుడి పాత్రలో ఆయన నటించడం లేదు. అవన్నీ వదంతులే’ అని యష్ టీమ్ వివరణ ఇచ్చింది. ఈ సినిమాలో రావణుడి పాత్ర కోసం గతంలో అగ్ర హీరో హృతిక్ రోషన్ను సంప్రదించగా ఆయన కూడా తిరస్కరించారు. రావణుడి పాత్రలో పాపులర్ హీరోను నటింపజేయాలనే ప్రయత్నంలో చిత్రబృందం ఉందని, అందుకే ఈ సినిమా సెట్స్మీదకు రావడానికి మరింత సమయం పడుతుందని అంటున్నారు. ఇక యష్ తన తదుపరి చిత్రాన్ని నర్తన్ దర్శకత్వంలో చేయబోతున్నారని సమాచారం.