Das Ka Dhamki Movie Trailer | టాలీవుడ్ యంగ్ హీరో విశ్వక్ సేన్ ఓ వైపు హీరోగా నటిస్తూనే మరో వైపు దర్శకుడిగా సినిమాలు తెరకెక్కిస్తూ ఇండస్ట్రీలో దూసుకుపోతున్నాడు. ఇటీవలే ఈయన నటించిన ‘ఓరి దేవుడా’ రిలీజై ఘన విజయం సాధించింది. ప్రస్తుతం అదే జోష్తో దాస్ కా ధమ్కీ చిత్రాన్ని రిలీజ్కు సిద్ధం చేస్తున్నాడు. విశ్వక్ హీరోగా స్వీయ దర్శకత్వంలో తెరకెక్కిస్తున్న ఈ చిత్రం ఇటీవలే షూటింగ్ పూర్తి చేసుకుంది. శివరాత్రి సందర్భంగా ఈ సినిమాను ప్రేక్షకుల ముందుకు తీసుకురావాలని మేకర్స్ సన్నాహాలు చేస్తున్నారు. ఇప్పటికే చిత్రం నుండి రిలీజైన పోస్టర్లు, టీజర్ సినిమాపై మంచి అంచనాలు నెలకొల్పాయి. తాజాగా ఈ సినిమా ట్రైలర్ను నందమూరి బాలకృష్ణ రిలీజ్ చేశాడు.
లేటెస్ట్గా రిలీజైన ట్రైలర్ ఆద్యాంతం ఆసక్తికరంగా సాగింది. ‘ఆశోక వనంలో అర్జున కళ్యాణం’, ‘ఓరి దేవుడా’ సినిమాలతో విశ్వక్ సాఫ్ట్గా మారాడా అనుకుంటుండగానే ‘దాస్ కా ధమ్కీ’తో తనలోని మాస్ను చూపించాడు. బాగా డబ్బులు ఉన్న ఒక వ్యక్తి చనిపోతే అతని లాగే ఉన్న మరో వ్యక్తి చనిపోయిన వారి స్థానంలోకి వెళ్లి అతని కుటుంబాన్ని ఎలా ఇబ్బందుల నుంచి కాపాడాడు అనే లైన్ తో ఈ చిత్రం సాగబోతున్నట్లు ట్రైలర్ చూస్తే తెలుస్తుంది. విశ్వక్ ఈ చిత్రంలో డ్యూయల్ రోల్ పోషిస్తున్నాడు. విశ్వక్కు జోడీగా నివేథాపేతురాజ్ నటిస్తుంది. పాన్ ఇండియా సినిమాగా రిలీజ్ కాబోతున్న ఈ చిత్రాన్ని విశ్వక్ తండ్రి కరాటే రాజు నిర్మిస్తున్నాడు. లియాన్ జేమ్స్ సంగీతం అందిస్తున్న ఈ సినిమాకి ‘నేను లోకల్’ ఫేమ్ ప్రసన్నకుమార్ బెజవాడ స్టోరీ అందిస్తున్నాడు.