ముంబై: బాలీవుడ్లో నటించింది కొన్ని సినిమాల్లోనే అయినా మంచి పేరు సంపాదించాడు యువ నటుడు కార్తీక్ ఆర్యన్. అతనికి సంబంధించిన తాజా వీడియో ఒకటి వైరల్( Viral Video )గా మారింది. తన లేటెస్ట్ మూవీ ఫ్రెడ్డీ కోసం మహారాష్ట్రలోని మహాబళేశ్వర్ సమీపంలో ఉండే పంచ్ఘనీలో షూటింగ్ చేస్తున్నాడు ఆర్యన్. ఈ క్రమంలో అలా సరదాగా అక్కడి ప్రకృతిని ఎంజాయ్ చేయడానికి కారులో బయటకు వెళ్లిన అతడు.. తిరిగి వెళ్లే సమయంలో దారి తప్పాడు. దారి కోసం వెతుకుతున్న అతన్ని అక్కడే ఉన్న పోలీసులు గుర్తు పట్టారు. అతనికి దారి చూపిస్తూ.. పనిలో పనిగా సెల్ఫీలో దిగడానికి పోటీలు పడ్డారు. కార్తీక్ ఆర్యన్ను చూసిన ఓ పోలీస్ వెంటనే మొబైల్ ఫోన్ తీసి సెల్ఫీకి రెడీ అయిపోయాడు. అంతేకాదు సన్గ్లాసెస్ తీయమని కూడా అతడు కార్తీక్ను అడగడం విశేషం. సెల్ఫీలు దిగడం పూర్తయిన తర్వాత అతనికి దారి చూపించి పంపించారు. ఈ వీడియోను చూసిన నెటిజన్లు కొందరు పోలీసుల తీరుపై మండిపడ్డారు. డ్యూటీ మధ్యలో ఇలా సెల్ఫీలు దిగడమేంటని ప్రశ్నించారు.