Vijay Sethupathi | ఒక వైపు స్టార్ హీరోగా కొనసాగుతూనే మరో వైపు క్యారెక్టర్ ఆర్టిస్టుగా, విలన్ పాత్రల్లో కూడా నటిస్తూ ప్రేక్షకులలో ప్రత్యేక గుర్తింపును సంపాదించికున్న నటుడు విజయ్ సేతుపతి. పాత్ర నచ్చితే చిన్న సినిమాల్లో కూడా నటించడానికి సిద్దంగా ఉండే అతికొద్ది మంది నటులలో ఈయన ఒకడు. ఉప్పెన సినిమాతో తెలుగు ప్రేక్షకులకు మరింత దగ్గరయ్యాడు. ‘ఉప్పెన’లో ఈయన పండించిన విలనిజంకు ప్రేక్షకుల నుంచి మంచి ప్రశంసలు దక్కాయి. ‘మాస్టర్’లో కూడా ఈయన విలనిజంకు మంచి మార్కులు పడ్డాయి. ఈ క్రమంలో విజయ్ సేతుపతి ముచ్చటగా మూడో సారి విలన్ పాత్రలో నటించబోతున్నట్లు కోలీవుడ్ వర్గాల నుంచి సమాచారం.
నయనతార బాయ్ఫ్రెండ్ విఘ్నేష్ శివన్, అజిత్తో ఓ సినిమా చేయబోతున్న విషయం తెలిసిందే. రాక్ స్టార్ అనిరుధ్ రవిచంద్రన్ సంగీతం అందిస్తున్న ఈ చిత్రంలో ప్రతినాయకుడి పాత్రలో నటించడానికి మేకర్స్ విజయ్ను సంప్రదించారట. పాత్ర నచ్చడంతో విజయ్ వెంటనే గ్రీన్ సిగ్నల్ ఇచ్చినట్లు సమాచారం. త్వరలోనే దీనిపై అధికారిక ప్రకటన వచ్చే అవకాశం ఉంది. విఘ్నేష్ శివన్ దర్శకత్వంలో విజయ్ సేతుపతి హీరోగా నటించిన ‘కణ్మణి రాంబో ఖతిజా’ తాజాగా విడుదలై మంచి విజయం సాధించింది. ప్రస్తుతం ఈయన కమల్ హాసన్ హీరోగా నటిస్తున్న ‘విక్రమ్’ సినిమాలో కీలకపాత్రలో నటిస్తున్నాడు.