Vidudhala Part-1 Movie Telugu Trailer | తమిళ దర్శకుడు వెట్రిమారన్ సినిమాలను అన్ని భాషల ప్రేక్షకులు ఆదరిస్తుంటారు. ఆయన దర్శకత్వం వహించిన సినిమాలన్ని బ్లాక్బస్టర్ హిట్లే. కమర్షియల్గానే కాదు క్రిటిక్స్ నుంచి కూడా గొప్ప ప్రశంసలు అందుకున్నాయి. విసరనై, వడివసాల్, వడ చెన్నై, అసురన్ వంటి పలు అద్భుతమైన సినిమాలు వెట్రి తెరకెక్కించాడు. ఇక ఆయన దర్శకత్వం వహించిన విడుతలై పార్ట్-1 వారం రోజుల కిందట తమిళంలో రిలీజై సంచలన వసూళ్లను సాధిస్తుంది. ప్రముఖ కమెడియన్ సూరిని హీరోగా పెట్టి వెట్రిమారన్ ఈసినిమాను తెరకెక్కించాడు. ఇక ఈ సినిమా వచ్చే వారం తెలుగులోనూ రిలీజ్ కానుంది. ఈ క్రమంలో చిత్రబృందం తెలుగు ట్రైలర్ను రిలీజ్ చేశారు.
తాజాగా రిలీజైన ట్రైలర్ ఆధ్యంతం ఆసక్తి రేకెత్తిస్తుంది. ట్రైలర్ను గమనిస్తే అడవి బిడ్డలైన గిరిజనులకు, పోలీస్ వారికి మధ్య నడిచే పోరాటంగా ఈ కథ తెరకెక్కినట్లు కనిపిస్తుంది. గిరిజనులకు అండగా విజయ్ సేతుపతి పెరుమాళ్గా కీలకపాత్ర పోషిస్తుండగా, సూరి కానిస్టేబుల్ పాత్ర పోషిస్తున్నాడు. పోలీసులకు సమస్యగా మారిన పెరుమాళ్ను పట్టుకునే ప్రయత్నంలో పోలీసులు గిరిజనులను హింసిస్తుంటారు. అప్పుడు పెరుమాళ్ పోలీసులను ఎలా అడ్డుకుంటాడు? పెరుమాళ్ను పట్టుకునేందుకు సూరి తన పై అధికారులకు ఎలాంటి సహాయం చేశాడు అనే అంశాలను ట్రైలర్లో చూపించారు. మనిషి పుట్టగానే.. ఒకరు పైన, ఇంకొకరు కింద, మరొకరు ఇంకా కింద అని వేరు చేసే మీరు వేర్పాటువాదులా? లేదా అందరం సమానమని పోరాడే మేము వేర్పాటు వాదులమా? అంటూ విజయ్ సేతుపతి చెప్పే డైలాగ్ ట్రైలర్కే హైలెట్గా నిలిచింది.
ఇలాంటి కథను ఇప్పటివరకు మనం ఎన్నో సార్లు చూసే ఉంటాం. కానీ వెట్రీమారన్ స్టైల్ మేకింగ్ వేరే లెవల్లో ఉంటుంది. ఇప్పటికే ఈ సినిమాకు తమిళంలో అదిరిపోయే కలెక్షన్లు వస్తున్నాయి. తెలుగులోనూ అదే స్థాయిలో కలెక్షన్లు సాధిస్తుందని చిత్రబృందం ధీమాగా ఉంది. ఇక తెలుగులో ఈ సినిమాను అల్లు అరవింద్ పెద్ద ఎత్తున రిలీజ్ చేస్తున్నాడు. అయితే ఈ సినిమాకంటే ముందు రోజు శాకుంతలం, రుద్రుడు సినిమాలు రిలీజ్ కానున్నాయి. మరీ ఈ రెండు సినిమాల పోటీని తట్టుకుని విడుదల సినిమా నిలుస్తుందా? లేదా? అనేది చూడాలి.