నవతరం మహిళ కథ

‘పురుషాధిక్యత కారణంగా మహిళలకు ఎదురయ్యే వివక్షకు వినోదం, ఉత్కంఠను మేళవిస్తూ రూపొందిన వెబ్‌సిరీస్‌ ఇది’ అని చెప్పింది తమన్నా. ఆమె ప్రధాన పాత్రలో నటించిన తెలుగు వెబ్‌సిరీస్‌ ‘లెవెంత్‌ అవర్‌’. ప్రవీణ్‌ సత్తారు దర్శకుడు. ‘ఆహా’ ఓటీటీ ద్వారా శుక్రవారం విడుదలైంది. ఈ సందర్భంగా ఏర్పాటుచేసిన పాత్రికేయుల సమావేశంలో తమన్నా మాట్లాడుతూ ‘సుదీర్ఘప్రయాణంలో చాలా సినిమాలు చేశా. కమర్షియల్‌ పంథాలో విభిన్నమైన పాత్రలు పోషించా. సినిమాల్లో దర్శకుల సూచనలకు అనుగుణంగానే పనిచేయాల్సివస్తుంది. ఓటీటీలో నటులకు ఎక్కువగా స్వేచ్ఛ దొరుకుతుంది. కొత్తదనాన్ని ప్రదర్శించడానికి ఆస్కారం ఉంటుంది. నా కెరీర్‌లో ఇప్పటివరకు చేయనటువంటి విభిన్నమైన పాత్రను ఈ వెబ్‌సిరీస్‌లో చేశా. సమాజంలోని నవతరం అమ్మాయిలందరికీ ప్రాతినిథ్యం వహిస్తూ సాగే ఈ పాత్ర సరికొత్త అనుభూతిని పంచుతుంది. పెద్ద కుటుంబంలో పుట్టి వ్యాపారవేత్తగా మారిన ఓ యువతి పురుషాధిక్య సమాజం నుంచి ఎలాంటి సమస్యల్ని ఎదుర్కొన్నది. ఆమె జీవితంలో ఉన్న మగవాళ్లతోనే తను ఎలాంటి పోరాటం చేయాల్సివచ్చిందనేది ఆకట్టుకుంటుంది. రెండేళ్ల క్రితం వెబ్‌సిరీస్‌లో నటించాలనే ఆలోచన మొదలైంది. కథ, కథాగమనంతో పాటు పాత్రలు శక్తివంతంగా ఉన్నప్పుడే వెబ్‌సిరీస్‌లు ప్రేక్షకుల్ని ఆకట్టుకుంటాయి. అవన్నీ ఈ వెబ్‌సిరీస్‌కు చక్కగా కుదిరాయి. సమాజంలో నెలకొన్న సంఘటనల్ని వాస్తవిక కోణంలో చూపించాం. సినిమాలు, వెబ్‌సిరీస్‌లు అనే భేదాలు నాకు లేవు. మంచి కంటెంట్‌లో భాగమవ్వడానికే ఇష్టపడతా. ప్రస్తుతం తెలుగులో సీటీమార్‌, గుర్తుందాశీతాకాలం, ఎఫ్‌-3తో పాటు హిందీ, తమిళంలో కొన్ని సినిమాలు చేస్తున్నా’ అని తెలిపింది.