వర్ణవివక్షకు వ్యతిరేకంగా

హీరోయిన్‌ ఇలియానా నటిస్తున్న సినిమా ‘అన్‌ఫెయిర్‌ అండ్‌ లవ్‌లీ’.రణ్‌దీప్‌ హుడా ప్రధాన పాత్రలో నటిస్తున్నారు. బల్వీందర్‌సింగ్‌ జుంజువా దర్శకుడు. సోనీ పిక్చర్స్‌ ఫిల్మ్స్‌ ఇండియా సంస్థ నిర్మించింది. ఈ చిత్రంలో వర్ణవివక్షను వ్యతిరేకిస్తూ సాగే పాత్రలో ఇలియానా నటిస్తున్నది. ఆమె పాత్ర పేరు లవ్‌లీ, రంగు తక్కువగా ఉండే ఆమె సమాజం నుంచి ఎలాంటి వివక్షను ఎదుర్కొంది అనేది సినిమాలో చూపిస్తున్నారు.

ఈ సినిమా గురించి ఇలియానా మాట్లాడుతూ…‘రంగు బాగుంటేనే అందంగా ఉన్నట్లు అని ఇప్పటికీ మనం అనుకుంటూ ఉంటాం. మా సినిమా ద్వారా ఈ సంప్రదాయ ఆలోచనలు మార్చే ప్రయత్నం చేస్తున్నాం. రంగు తక్కువగా ఉన్న లవ్‌లీ అనే అమ్మాయి సమాజంతో చేసిన పోరాటమే ఈ సినిమా. అలాగని మా సినిమాలో సందేశాలు ఇవ్వలేదు.

వినోదాత్మకంగా కథను చెబుతూనే ఆలోచింపచేశాం. ఇది చూశాక కొందరిలోనైనా మార్పు వస్తుందని ఆశిస్తున్నాం’ అని చెప్పింది. ఇలియానా ప్రస్తుతం విద్యాబాలన్‌, ప్రతీక్‌ గాంధీలతో కలిసి షిర్షా గుహ దర్శకత్వంలో మరో చిత్రంలో నటిస్తున్నది.